Hena Waroma 2 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo touna mbande, mundu we, ose akeye uchilia: amu magheri uchilia ungi, ukuchilia mwenye; amu we uchilia uketa vindu ivyoivyo.

² Na twatisiwa ti wuchili wa Izuwa ni hena kididi wanga yawo weketa vindu sa ivi.

³ Ugheshijia iki, mundu we, uchilia wala weketa vindu sa ivi, na uviteka ivyoivyo, ti unepughunyuka wuchili wa Izuwa?

⁴ Kana udaa wumazi na uwedi wakwe na kugumiria na kuting’iria, usitisiwe ti uwedi wa Izuwa wukutika hena kuchwa‐muti?

⁵ Kake hena kuguma kwako na ngoro ya kusahana ukuwumbia oro hena musi wa oro na ujughuo wa wuchili‐wa‐ngalo wakwe Izuwa;

⁶ Ye enemng’olia mundu ose hena mihiro yakwe.

⁷ Hena wala ewo weenda kirumi na nganyi na kusanyamarika hena kugumiria ghati ya kuketa nezo, moo wa ndarasi;

⁸ kake hena wala wekanana na weigolong’ia kididi na weinga isikio wusiwungalo,

⁹ oro na kuregija, wasi na luwawo, wanga ya ngoro yose ya mundu ehira viwiwi, ya Myahudi kuwoka, na ya Myonani pia;

¹⁰ kake kirumi, nganyi, na luworo, hena mundu ose ehira vyedi, hena Myahudi kuwoka, na hena Myonani pia:

¹¹ amu tehena lukundio lwa wandu ha Izuwa.

¹² Amu wose weketie ng’oki wesihete sheria weneteka pia wesihete sheria: na wose weketie ng’oki si ya sheria wenechiliwa hena sheria;

¹³ amu si wasikii wa sheria ewasingisi msongorana wakwe Izuwa, nde waketi sheria wenetarwa kuoka na singisi.

¹⁴ Amu magheri Mambare, wesina sheria weketa hena lukishoni vindu vya sheria, awa, wesina sheria, ni sheria hawo wenye;

¹⁵ wekiwonja ndima ya sheria itamiwe ngoroni hawo, lusaro lwawo luking’ola mburi, na makusaro mawo mekilinganyana kana mekishighiana;

¹⁶ Musi ula Izuwa enejichilia mbiso ja wandu, hena anjili yangu, hena Yesu Kristo.

¹⁷ Kake ukiitangwa na izina la Myahudi, na ukiikaa wanga ya sheria, na ukikuisisa ghati ya Izuwa,

¹⁸ na ukitisiwa kila ekikundie, na ukiisejwa na vindu vila vyedi,

¹⁹ ukiloshwa ghati ya sheria, na ukikugheshijia ti we mwenye umrongoria wawo webajike‐meso, kyangaji kya wala weoho kijeni,

²⁰ mchunda wawo wetomode, mlosha wa ngerengere, una fwana ya lutwarijo na ya kididi hena sheria;

²¹ hena lwa iyo we uoho ulosha ungi, toukulosha mwenye? we umtindia mundu asihiwe, uhiwa we?

²² we ughamba mundu asishinde, ushinda we? we ushishirwa na masanamu, uhiwa we vindu vya hekalu?

²³ we ukuisisa ghati ya sheria, hena kuiwaa sheria toumwima we Izuwa nganyi?

²⁴ Amu izina la Izuwa larighwa ghati ya Mambare hena lwa unywi, sandu itamiwe.

²⁵ Amu kutawanwa kididi kuna mbucha, ije ugura sheria: kake ije waoka mbai wa sheria, kutawanwa kwako kwaoshwa kusatawanwa.

²⁶ Hena lwa iyo ije kusatawanwa kugura maitanawo ma sheria, kusatawanwa kwakwe tokunetarwa kuoka kusatawanwa?

²⁷ Na kusatawanwa kuoho hena lukishoni, ije kufisha sheria, tokunekuchilia we, ubaa sheria hena itamo na kutawanwa?

²⁸ Amu ula si Myahudi, eoho hena mikayie ya some; nete kula si kutawanwa, kuoho some hena muri:

²⁹ Kake ula ni Myahudi, eoho hena mikayie ya ndeni; na kutawanwa ni kula kwa ngoro, hena ngoma, na si hena itamo; ngisisa yakwe si ya wandu, nde ya Izuwa.