Hena Waroma 16 - Sumu Yedi ya Isa Masiya 1906 Kitamo 1897 Malumbo 1905

¹ Nambikia Foibe rumburia wetu, eye mhiri wa kanisa lioho Kenkereai:

² nesa mumuuhie ghati ya Mzuri, sandu iinarwe hena weshenete, na mumghenje ghati ya kindu akeye embaiiya: amu mwenye eokie mughenja wa weingi, na wangu mi mwenye.

³ Wakezieni Priska na Akula wahiri hamwe na mi ghati ya Kristo Yesu,

⁴ ewo hena moo wangu wemayajie masingo mawo wenye; na awa si mi tiki nawang’olia haika, nde na makanisa mose ma Mambare:

⁵ na likezieni kanisa lioho nyumbeni hawo. Mkezieni Epaineto mkundwa wangu, eye malumbulwa ma Asia hena Kristo.

⁶ Mkezieni Maryamu, eye emuhirie muno unywi.

⁷ Wakezieni Androniko na Yunia, wa iwee langu, na wachungwa hamwe na mi, ewo wa kirumi ghati ya waondo, ewo pia wenirongoria kuoka ghati ya Kristo.

⁸ Mkezieni Ampiliato mkundwa wangu ghati ya Mzuri.

⁹ Mkezieni Urubano mhiri hamwe na uswi ghati ya Kristo, na Sitaku mkundwa wangu.

¹⁰ Mkezieni Apelle eye ekundike ghati ya Kristo. Wakezieni wala ewo wa hakwe Aristobulo.

¹¹ Mkezieni Herodioni wa iwee langu. Wakezieni wala wa hakwe Narkiso, ewo ghati ya Mzuri.

¹² Wakezieni Trifaina na Trifosa, ewo wehira ghati ya Mzuri. Mkezieni Persisi mkundwa, eye ehirie muno ghati ya Mzuri.

¹³ Mkezieni Rufus msaghurwa ghati ya Mzuri, na mee, eye iya wangu.

¹⁴ Wakezieni Asunkrito, Flegoni, Hermesi, Patrobasi, Hermasi, na wandu‐wa‐hetu weoho hamwe nawo.

¹⁵ Wakezieni Filologo na Yulia, Nereo na rumburie, na Olumpasi, na weshenete wose weoho hamwe nawo.

¹⁶ Kezianeni na kunyonyoza kushenete. Makanisa mose ma Kristo mamukezia.

¹⁷ Nawa namusemba, wandwetu, muwawenge wala weareha matanyo na misadara isigurane na ichundo muloshijwe: na mugharuke kufuma hawo.

¹⁸ Amu wala sa awa tewemtumikiawo Mzuri wetu Kristo, kake ndeni yawo wenye; na hena kuteta kwawo kunyoie na kwa‐kuiseja wekenga ngoro yawo wesina‐kutekwa.

¹⁹ Amu kuinga‐isikio kwenyu kwatoranywa ghati ya wandu wose. Hena lwa io naizihirwa wanga yenyu: kake nikundie muchee ghati ya kila ekyo kyedi, na musichee hena kila ekyo kiwiwi.

²⁰ Na Izuwa wa luworo enembunyua Shetani si ya maghu menyu wanguwangu. Mvono wa Mzuri wetu Yesu Kristo uoke hamwe na unywi.

²¹ Timoteo mhiri hamwe na mi emukezia, na Lukio na Yasoni na Sosipateri, wa iwee langu.

²² Mi Tertio, natama waraka uu, namukezia ghati ya Mzuri.

²³ Gaio, eye enitiigha, na mwenye kutiigha kanisa lose, emukezia.

²⁴ Erasto mrindi‐fetha wa kiongo emukezia, na Kuarto mundu‐wa‐hetu.

²⁵ Nawa hakwe eye eidima kumuduwija hena anjili yangu na hena kutinda kwa Yesu Kristo, hena ujughuo wa mbiso iwisiwe chwi ghati ya magheri ma ndarasi,

²⁶ kake ingeriaha yawonjwa raa, na hena matamo ma waroti, hena aghanyo la Izuwa wa ndarasi, itisiwike ghati ya mbare jose hena kuinga‐isikio kwa luitikijo:

²⁷ ha Izuwa, eye mjenye echee, hena Yesu Kristo, hakwe kioke kirumi ndarasi. Esai.