Hena Waroma 14 - Sumu Yedi ya Isa Masiya 1906 Kitamo 1897 Malumbo 1905

¹ Kake ula emnana hena luitikijo mtiigheni, nde si hena malelano ma makusaro.

² Mundu mwe ena luitikijo lwa kula vindu vyose: kake ula mnana ela mamishunga.

³ Ula ela asimdae ula esila; na ula esila asimchilie ula ela: amu Izuwa amwuhia.

⁴ Niweni ti umchilia mtumwi wa ungi? hena mzuri wakwe mwenye eimuka kana egwa. Ee, eneimushwa, amu Mzuri ena zinya kumwimusha.

⁵ Munda mwe eitaa musi mwe wanga ya ungi: ungi eitaa musi ose. Mundu ose atisiwe dawu ikusaro lakwe.

⁶ Ula eyoa musi, euyoa hena Mzuri: na ula ela, ela hena Mzuri, amu emwanjela Izuwa: na ula esila, hena Mzuri telaye, na emwanjela Izuwa.

⁷ Amu tehena wa hetu ekia mwenye, na tehena efwa mwenye.

⁸ Amu ije tuoho na moo, tuoho na moo hena Mzuri: ana ije tufwa, tufwa hena Mzuri: hena lwo io ije tuoho na moo, ana ije tufwa, tu wakwe Mzuri.

⁹ Amu hena lwa io Kristo efwie, na eoho na moowa, nesa aoke Mzuri wa wose weri, wefwie na weoho na moo.

¹⁰ Kake we, nini umchilia mdwenyu? ana wewa, nini umdaa mdwenyu? amu wose tuneimuka msongorana wa kiikayo‐kya‐wuchili kya Izuwa.

¹¹ Amu itamiwe, Sandu nioho na moo, ateta Mzuri, ikunguru lose linenidung’utia, na lumi lose linemghamba Izuwa.

¹² Huwora ose wa hetu eneng’ola kutara kwakwe mwenye ha Izuwa.

¹³ Hena lwa io tusichilianewa: kake keba chilieni iki, mundu asimgere mdwawo msadara nzieni, ana kindu kya kugusha.

¹⁴ Natisiwa, na nailejika ghati ya Kristo Yesu, ti tehena kindu kina ikwe kijenye: esire hena ula etara kindu akeye kuoka na ikwe, hena ye kina ikwe.

¹⁵ Amu ije hena lwa nyama mdwenyu eshiniwe, touselawe ghati ya lukundo. Usinyamare na nyama yako ula hena ye Kristo efwie.

¹⁶ Hena lwa io uwedi wenyu usitetwe owiwi:

¹⁷ amu ufumwa wa Izuwa si kula na kunywa, kake ngalo na luworo na luizihiro hena Ngoma Mshenete.

¹⁸ Amu ula emhiria Kristo ghati ya ii, emwiseja Izuwa, na ekundika ghati ya wandu.

¹⁹ Huwora tuviratere vila viete luworo, na vila henavyo twaidima kujengiana.

²⁰ Msigushe hena lwa nyama ndima ya Izuwa. Vyose kididi vizerre, kake ni kiwiwi hena mundu ula eye ela hena msadara.

²¹ Ni kyedi kusala nyama, nete kunywa mvinyo, nete kuketa kyose akeye, henakyo mdwenyu akubighe msadara.

²² Luitikijo uluhete, uhete mwenye msongorana wa Izuwa. Etasiwa ula esikuchilia mwenye ghati ya kila ekyo ekigheshijia.

²³ Kake ula eitalwa echiliwa magheri ela, amu telaye hena luitikijo; na kyose esi kya luitikijo ni ng’oki.