Hena Waroma 12 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo namsemba, wandwetu, hena malusario ma Izuwa, muing’ole miri yenyu itasi lina moo, lishenete, likundike ha Izuwa, elo luhirio lwenyu lwa kucha.

² Na musioke mukifwananijwa na masanga ama, kake mugharushwe hena kuwawuka kwa lusaro lwenyu, mbone kuwonja kila kikundike kya Izuwa, ekyo kyedi na kiuhika na kiirowili.

³ Amu namburra mundu ose eoho ghati yenyu, hena mvono niingiwe, asikugheshijie vibaha kukela imbe kugheshijia; nde kugheshijia sandu kugheshijia hena mng’a na, sandu Izuwa emghawie mundu ose mng’ana wa luitikijo.

⁴ Amu sandu tuna marungo meingi ghati ya muri mwe, na marungo mose temena ndima mwe:

⁵ huwo uswi, tu weingi, tu muri mwe ghati ya Kristo, na marungo imwe imwe uswi hena uswi.

⁶ Na tukioka na viingijo vilelane hena mvono tuingiwe, ije wuroti, turote hena mng’ana wa luitikijo lwetu;

⁷ kana luhirio, tukuingije hena luhirio lwetu; kana ula elosha, hena kulosha kwakwe;

⁸ kana ula etinda, hena kutinda kwakwe; ula einga, na kuora; ula eitoria, na lunyarki; ula esaria, hena luizihiro.

⁹ Lukundo luoke lusina ukeleki. Shishirrweni na kila ekyo kiwiwi; guraneni na kila ekyo kyedi.

¹⁰ Ghati ya lukundo lwa wandu wa hetu kundaneni; hena nganyi mukirongoja waghenji:

¹¹ hena lunyarki, si wanyaluu; mukiaka ngoroni; mukimtumikia Mzuri.

¹² Mukiizihirwa hena luing’idaki; mukigumiria mawasi; mukiikaa ghati ya kuomba musiiting’o;

¹³ mukishangana nawo washenete hena mawaiyo mawo; mukitiigha wagheni.

¹⁴ Watasieni wala wemkinya: tasieni, nete musisese.

¹⁵ Izihirweni hamwe nawo weizihirwe; iyeni hamwe nawo weiya.

¹⁶ Muoke na ngoro mwe mundu na mughenji. Musikusare vindu vya wanga, kake muiname hena vindu vioho si.

¹⁷ Musikubaebae hena kucha. Musimwihie mundu wuwiwi hena wuwiwi. Kusareni vindu vya nganyi mesoni ha wandu wose.

¹⁸ Ije kiidimika, hena mbai yenyu, muoke na luworo na wandu wose.

¹⁹ Musikuihie lawi wenye, wekundiwe, nde ingeni mwanya oro, amu itamiwe, Kuihia lawi ni kwangu, nineiha, ateta Mzuri.

²⁰ Kake mring’a wako ekisikia nzaa, mrishe: ekisikia ngiru, mwinge anywe: amu hena kuketa huwo unemwumbia makaa ma moto mtwini.

²¹ Musilelwe ni wuwiwi, nde leleni wuwiwi na medi.