Hena Waroma 11 - Sumu Yedi ya Isa Masiya 1906 Kitamo 1897 Malumbo 1905

¹ Naghambara, Izuwa ewatihie wandu wakwe? Kiwawe. Amu mi pia Mwisraeli, wa mkuju wa Ibrahimu, wa iwee la Benyamini.

² Izuwa tewatihie wandu wakwe ewatisiwe kuwoka. Kana tomutisiwa nikini itamo lateta hena Eliya, nize emsemberere Izuwa wanga ya Israeli,

³ Mzuri, wakoma waroti wako, waghusha visiko vyako: nami mwenye nashighwa, na weenda ngoro yangu.

⁴ Kake nikini iteta italuo la Izuwa hena ye? Nakushighia wandu elfu kandu kafungate, ewo wesidung’utija ikuguru hena Baal.

⁵ Huwo hena magheri ma iki pia mashighajiko hena wusaghuro wa mvono.

⁶ Kake ije kioho hena mvono, tekiohowa hena mihiro: ije esihuwo, mvono si mvonowagho.

⁷ Nikinira? Kila ekyo Israeli ekienda, tekiwonieye: kake wusaghuro wukiwonie, na wala weshighajike wegumijwe:

⁸ sandu itamiwe, Izuwa ewaingie ngoro ya lughohe, meso wasiwone, na masikio wasisikie, mtano yoo ichi.

⁹ Na Daud eteta, Meza jawo jioshwe izero na mtegho, na msadara, na maihio hawo;

¹⁰ meso mawo makete kija, wasiwone, na uwainamije mighongo misi yose.

¹¹ Naghambara, Wekubighie msadara nesa wagwe? Kiwawe: kake hena kugwa kwawo lukio lwamazia Mambare, hena kuwawusha mtano kuneng’a.

¹² Na ije kugwa kwawo ni wumazi wa masanga, na lutesho lwawo wumazi wa Mambare: nize muno kuizua kwawo?

¹³ Kake nateta na unywi Mambare. Nikioka nimi mwondo wa Mambare, nawutogola wuhiri wangu:

¹⁴ Ije ngea niwawushe mtano kuneng’a wala ewo muri wangu, na niwone kukija mondo wawo.

¹⁵ Amu ije kuwatagha ni kukundanywa kwa masanga, nikini kuneoka kuwauhia, nde moo kufuma wefwie?

¹⁶ Na ije malumbulo meshenete, huwo namo mafindiko: na ije kikolo kishenete, ni huwo na mbagha pia.

¹⁷ Kake ije mondo wa mbagha jibaiwe, na we u mzeituni wa kititoni uokie ukibandikiwa ghati yajo, ukaoka mshanga wajo wa wubandi wa mzeituni:

¹⁸ usikuisise wanga ya mbagha: kake ije ukuisisa, si we rawe ukitikije kikolo, nde kikolo kyakutika we.

¹⁹ Uneghambara, Mbagha jibaiwe, nesa niwone kubandikiwa mi.

²⁰ Kyedi: hena kusaitikija kwawo webaiwe, na we uimuka hena luitikijo. Usioke wa mafuti ngoroni, nde ituka:

²¹ amu ije Izuwa teshighirie mbagha ja mboneka, nete tenekushighiria we.

²² Yoenira uwedi na kukaeha kwakwe Izuwa: hena wo wegwie, kukaeha; nde hena we, uwedi wa Izuwa, ukiikaa misi yose ghati ya uwedi wakwe: ije esihuwo, na we pia unetemwa.

²³ Nawo pia, ije teweikaa ghati ya kusaitikija kwawo, wenebandikiwa; amu Izuwa eidima kuwabandikiawa.

²⁴ Amu ije utemiwe hena ula egho hena mboneka mzeituni wa kititoni, ukabandikiwa hena nzia esiya mboneka hena mzeituni wedi: nize kukela muno awa, ewo mbagha hena mboneka, wenebandikiwa hena mzeituni wawo wenye?

²⁵ Amu sikundiemi, wandwetu, musitisiwe mbiso ii, musiwone kukubaabaa hena kucha, ti wugumi wa mondo wugwie Israeli, mtano kuizua kwa Mambare kuneingia;

²⁶ na huwo Israeli wose wenekijwa: sandu itamiwe, Mukija enefuma ghati ya Sayuni, enegharusha wusui‐izuwa kufuma Yakobo:

²⁷ na ili nilo aghanyo langu hawo, nikiwushija ng’oki jawo.

²⁸ Hena mburi ya anjili, niwo wazo hena lwenyu: kake hena mburi ya wusaghuro, wekundike hena lwa waapa.

²⁹ Amu viingijo na kuitangwa kwa Izuwa kuoho kusina kuhana.

³⁰ Amu sandu unywi magheri mevetie muokie mumgolong’ie Izuwa, kake ingeriaha mwawona lusario hena kugolong’a kwawo,

³¹ huwo na awa pia weokie wegolong’i, nesa hena lusario luwonjiwe henyu woo pia wawone ingeriaha lusario.

³² Amu Izuwa awachungia wose hena kugolong’a, nesa awasarie wose.

³³ Oi kuforeke na wumazi wa kucha na lutwarijo lwakwe Izuwa! Nize mawuchili makwe mesiendika, na nzia jakwe jisitamika!

³⁴ Amu niani etisiwe lusaro lwakwe Mzuri? kana niani eokie mchundi wakwe?

³⁵ Kana niani kuwoka amwinga, na kineihiwa hakwewa?

³⁶ Amu kufuma hakwe, na ghati yakwe, na hena ye, vyose vioho. Hakwe kioke kirumi ndarasi. Amen.