Hena Waroma 10 - Sumu Yedi ya Isa Masiya 1906 Kitamo 1897 Malumbo 1905

¹ Wandwetu, kila kikundiwe na ngoro yangu na kusemba kwangu kwa Israeli ha Izuwa henawo nikyo iki, wawone kukijwa.

² Amu nawang’olia mburi ti wena lunyarki hena Izuwa, nde si hena lutwarijo.

³ Amu wekioka tewetisiwe ngalo yakwe Izuwa, na wekienda kuiduwija yawo wenye, tewekugerie si ya ngalo yakwe Izuwa.

⁴ Amu Kristo ni mwidiwiko wa sheria hena ngalo hena mundu ose eitikija.

⁵ Amu Musa etama ti mundu eareha ngalo eyo hena sheria enekia henayo.

⁶ Kake ngalo eyo ya luitikijo lwateta huwu, Usighambe ngoroni hako, Niani enekwea wanga? (nikyo, kumseja Kristo);

⁷ Kana, Niani enesea na abusso? (nikyo, kumkweja Kristo kufuma wefwie.)

⁸ Kake yatetaze? Kiteto kioho afuhi yako, ghati ya itumbu lako, na ghati ya ngoro yako: nikyo, kiteto kya luitikijo, ekyo tukitinda.

⁹ Amu ukighamba na itumbu lako ti Yesu ni Mzuri, na ukiitikija ngoroni hako ti Izuwa emrushije kufuma wefwie, unekijwa.

¹⁰ Amu hena ngoro mundu eitikija hena ngalo; na hena itumbu lughambo luarehwa hena lukio.

¹¹ Amu itamo lateta, Ose eitikija hena ye tekagerwe nguruna.

¹² Amu tehena wutanyo ghati ya Myahudi na Myonani: amu Mzuri uouo ni Mzuri wa wose, na ni mmazi hena wose wemwitanga:

¹³ amu, Ose eneliitangia izina la Mzuri enekijwa.

¹⁴ Nize wenemwitanga ula wesimwitikije? na nize wenemwitikija ula wesimemsikie? na nize wenesikia wesina mtinda?

¹⁵ Na nize wenetinda esire ti weingijwe? sandu itamiwe, Ni medi sa kini maghu mawo weete anjili ya vindu vyedi!

¹⁶ Kake tewesikie wose anjili. Amu Isaya eteta, Mzuri, niani eitikije mburi jetu?

¹⁷ Huwo kuitikija ni hena kusikia, na kusikia hena kiteto kya Kristo.

¹⁸ Kake naghamba, Tewesikie? ee, kididi. Ngori yawo ifumie hena masanga mose, na viteto vyawo hena miidiwiko ya masanga.

¹⁹ Kake naghamba, Israeli tetisiwe? Kuwoka hena Musa etata, Ninemuwusha hena kuneng’a na ila esiyo mbare, na hena mbare isina kutwarija ninemureghija.

²⁰ Na Isaya ekaria muno, na eteta, Niwoniwe nawo wesiniendie; nikaoka raa hawo wesiniombie.

²¹ Kake hena mburi ya Israeli eteta, Hemusi puti nirongie mikono yangu hena wandu wegolong’i na wekanani.