Hena Wakolossai 4 - Sumu Yedi ya Isa Masiya 1906 Kitamo 1897 Malumbo 1905

¹ Wazuri, waihieni wazoro wenyu kila ekyo kya singisi na kya kuringanana; mukitisiwa ti unywi pia muna Mzuri wanga.

² Ikaeni ghati ya kuomba, mukichewa ghati yakwe na kuanjela:

³ mukituombia na uswi pia, Izuwa atujughuie mbenge hena kiteto, kuteta mbiso ya Kristo, hena iyo mi pia nioho machungoni:

⁴ nesa nikiwonje raa, sandu yaniwe kuteta.

⁵ Seleni na kucha hena wala wa some, mukikuzoria magheri.

⁶ Kuteta kwenyu kuoke misi yose na mvono, kukinonijwa na munyu, nesa mutisiwe nize yambe kutalwa mundu ose.

⁷ Tukiko enemutisiwija vindu vyangu vyose, eye mundu wa hetu mkundwa na muzoro mughenji ghati ya Mzuri:

⁸ na namwingija henyu hena ndima ii, mutisiwe mikayie yetu, na ajidindije ngoro jenyu:

⁹ hamwe na Onesimo, mundu wa hetu mwitikiji na mkundwa, eye mwe wenyu. Awa wenemutisiwija vindu vyose viketike aha.

¹⁰ Aristarko, echungwa hamwe nami, emkezia, na Marko, ngawu wakwe Barnaba (hena ye muuhie maaghanyo; ekimuzia, mwuhieni),

¹¹ na Yesu, eitangwa Yusto, ewo wa kutawanwa: awa tiki wahiri hamwe na mi hena ufumwa wa Izuwa, wandu weokie ludindijo hangu.

¹² Epafra, eye mwe wenyu, mzoro wa Kristo Yesu, emukezia, ekimuketia lunyarki misi yose ghati ya maombo makwe, muimuke waining’oi na wetisiwijwa dawu ghati ya kukunda kwakwe Izuwa.

¹³ Amu namng’olia mburi, ti ehira muno hena lwenyu, na hena wala weoho Laodikea, na hena wala weoho Hierapoli.

¹⁴ Luka, mughanga mkundwa, na Dema, wemukezia.

¹⁵ Wakezieni wandu wa hetu weoho Laodikea, na Numfa, na kanisa lioho nyumbeni hawo.

¹⁶ Wa waraka uu ukiidiwa kusomwa henyu, uingeni usomwe pia ghati ya kanisa la Walaodikea; na ti unywi pia muusome waraka wa Laodikea.

¹⁷ Na mburreni Arkipo, Uluyoe luhirio uingiwe ghati ya Mzuri, ulukurije.

¹⁸ Ngezia yangu mi Paulo na mkono wangu mwenye. Kumbukeni machungo mangu. Mvono hamwe na unywi.