Hena Wakolossai 3 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo mukioka murukie hamwe na Kristo, endeni vindu vioho wanga, handu Kristo eoho, eikee hena mkono wa kuume wa Izuwa.

² Kusareni vindu vya wanga, si vindu vioho masangeni.

³ Amu mufwie, na moo wenyu uwiswa hamwe na Kristo ghati ya Izuwa.

⁴ Kristo, eye moo wetu, eneikaewonyanywe raa, niho na unywi hamwe naye munewonyanywa ghati ya kirumi.

⁵ Hena lwa iyo mafwijeni marungo menyu meoho masangeni; mbuya, ikwe, oro, kukunda kuwiwi, na kulangwa, niko kuomba‐sanamu;

⁶ hena lwa vindu ivi oro ya Izuwa yaza wanga ya waana wa kugolong’a;

⁷ na ghati ya ivi na unywi pia muselie kae, mukinaikae ghati yavyo.

⁸ Kake ingeriaha wikeni hae ivi vyose; kuregija, oro, tiri, kurigha, kuteta vyanguruna kufuma itumbu lenyu:

⁹ musichwe maongo mundu na mughenji, mukioka muhambue mundu wa kae na mihiro yakwe,

¹⁰ na mwadoka mundu msha, ewawuwe ghati ya lutwarijo lwa mwa yakwe ula emlungie;

¹¹ niho teidima kuoka Myonani na Myahudi, kutawanwa na kusatawanwa, mshenzi, Mskuthi, mzoro, esimzoro: nde Kristo ni vyose, na ghati ya vyose.

¹² Hena lwa iyo dokeni, sa wasaghurwa wakwe Izuwa, ngoro ya lusario, wuketi vyedi, kinyenya, wuhoo, lugumirio;

¹³ mukitikana mwa na mughenji, na mukishighiana, mundu ekioka na kiteto wanga ya ungi; sandu Kristo emushighie unywi huwo na unywi pia mukete:

¹⁴ na wanga ya vindu ivi vyose dokeni lukundo, nilu luchungo lwa uining’oi.

¹⁵ Na luworo lwa Kristo luitorie ngoroni henyu, hena ulu pia mwaitangwa ghati ya muri mwe; na muoke wandu wa haika.

¹⁶ Kiteto kyakwe Kristo kitue henyu na wumazi ghati ya kucha kwose; mukiloshana na mukitindiana na malumbo na vivino na kuvina kwa ngoma, mukivina na mvono ngoroni henyu hena Izuwa.

¹⁷ Na kyose mwaketa, ghati ya kiteto kana ghati ya mhiro, vyose hena izina la Mzuri Yesu, mukimwinga haika Izuwa Apa hena ye.

¹⁸ Wache, muitoriwe na wome wenyu, sandu iinare ghati ya Mzuri.

¹⁹ Wome, wakundeni wache wenyu, nete musioke wekaehe wanga yawo.

²⁰ Waana, waingeni isikio warembona wenyu ghati ya vyose, amu iki kyamwiseja Mzuri.

²¹ Waapa, musiwareghije waana wenyu, wasibaike ngoro.

²² Wazoro, waingeni isikio ghati ya vindu vyose wazuri wenyu hena muri; si na kutumikia meso, sa waiseji wandu, nde na ngoro iirowili, mukimwondoka Mzuri:

²³ kyose mwaketa, hireni na ngoro, sa hena Mzuri, na si hena wandu;

²⁴ mukitisiwa ti kufuma hakwe Mzuri muneuhia maihio ma uhoja: mwamtumikia Mzuri Kristo.

²⁵ Amu ula eketa viwiwi eneuhiawa hena viwiwi eviketie; na tehenaho lukundio.