Hena Wakolossai 2 - Sumu Yedi ya Isa Masiya 1906 Kitamo 1897 Malumbo 1905

¹ Amu nikundie mutisiwe nize naketa lunyarki muno hena lwenyu, na hena lwa wala weoho Laodikea, na hena wose wesimewona wusho wangu ghati ya muri;

² ngoro jawo jidindijwe, wekilunganywa ghati ya lukundo, na hena wumazi wose wa kutwarija dawu, waitisiwe mbiso ya Izuwa, eye Kristo,

³ ghati yakwe sule jose ja kucha na lutwarijo jawiswa.

⁴ Naghamba iki, mundu akeye asimukenge na viteto vya kuileja.

⁵ Amu ikaoka nisioho hena muri, kake nioho hena ngoma, nikiizihirwa na nikiyoa mitongie yenyu, na kudinda kwa luitikijo lwenyu ghati ya Kristo.

⁶ Hena lwa iyo sandu mumwuhie Kristo Yesu Mzuri, huwo seleni ghati yakwe,

⁷ mukioka na migi na mukijengwa ghati yakwe, na mukidindijwa ghati ya luitikijo lwenyu, sandu muloshijwe, mukineta muno ghati ya kuanjela.

⁸ Kuyoeni asioke mundu amutaha hena filosofia yakwe na makengo mahaya, hena mauhio ma wandu, hena miwoko ya masanga, na si hena Kristo.

⁹ Amu ghati yakwe kwaika kuizua kwose kwa Wuizuwa hena kirumi,

¹⁰ na ghati yakwe mwaizujwa, eye mtwi wa ibohio lose na zinya:

¹¹ na ghati yakwe mukatawanwa na kutawanwa kusiarehiwe na mikono, ghati ya kuuhambua muri wa nyama, ghati ya kutawanwa kwa Kristo:

¹² mukijikwa hamwe naye ghati ya lubatizo, na ghati ya ulu mukarushwa hamwe naye hena luitikijo lwa kuhira kwakwe Izuwa, emrushie ghati ya wefwie.

¹³ Na unywi mukioka mufwie hena matekwa menyu na kusatawanwa kwa nyama yenyu, emuingie moo hamwe naye, ekitushighia matekwa metu mose;

¹⁴ ekikihaija kitamo kitamiwe ghati ya maitanawo ekyo wanga yetu, kilelana na uswi: akakiwushija kufuma ghati, ekikichunga na misomari hena msalaba wakwe;

¹⁵ na ekikuhambua mabohio na mawuzinya, akamawika raa msongorana wa wose, ekimang’aria ghati ya msalaba uu.

¹⁶ Hena lwa iyo mundu asimchilie hena vindu vya kijo, kana vya kunywa, kana hena mburi ya musi wa ngasu kana mweji msha kana musi wa sabato:

¹⁷ evyo kivuri kya vindu vineza: kake muri ni wakwe Kristo.

¹⁸ Mundu asimuhiwie awahache yenyu hena kinyenya kya ng’ida na kuomba malaika, ekiikaa ghati ya vindu eviwonie, ekikubaabaa wesho hena lusaro lwa muri,

¹⁹ na asigure nezo Mtwi, ghati ya uu muri ose, ukiarehiwa na ukilunganywa hena marungo na makano, uneta na kuneta kwakwe Izuwa.

^20-21 Kwakicha mufwie hamwe na Kristo hena miwoko ya masanga, nini, sa wenye kuikaa masangeni, mwakugera kuitoriwa na maitanawo, Usigure, usichame, usikuware

²² (na ivi vyose vyateka ghati ya kuhiriwa), hena malosho na machundo ma wandu?

²³ Vindu ivi kididi vina lufumirio lwa kucha ghati ya luhirio lwa ngoro, na kinyenya, na kuuketia muri vidindie; kake tevina mbucha deng’e wanga ya malangwa ma muri.