Hena Wakolossai 1 - Sumu Yedi ya Isa Masiya 1906 Kitamo 1897 Malumbo 1905

¹ Paulo, mwondo wa Kristo Yesu hena lukundo lwa Izuwa, na Timoteo mundu‐wa‐hetu,

² hena weshenete na wandu‐wa‐hetu waitikiji ghati ya Kristo weoho Kolossai: Mvono henyu na luworo kufuma Izuwa Apa wetu.

³ Twamwanjela Izuwa Wawee Mzuri wetu Yesu Kristo, tukim wombia misi yose,

⁴ tukioka tusikie mburi ya luitikijo lwenyu luoho ghati ya Kristo Yesu, na ya lukundo muna hena weshenete wose,

⁵ amu ya luing’idaki muwikiwe wanga, mulusikie kuwoka ghati ya kiteto kya kididi kya anjili, izie henyu;

⁶ sandu ioho pia ghati ya masanga mose ikigera ndunda na ikineta, sa ghati yenyu pia, too musi musikie mukatisiwa mvono wa Izuwa hena kididi;

⁷ sandu muloshiwe na Epafra mzoromughenji wetu mkundwa, eye mhiri mwitikiji na Kristo hena lwetu,

⁸ niye pia etutindie lukundo lwenyu ghati ya Ngoma.

⁹ Hena kindu iki uswi pia, too musi tusikie, totushigha kumuombia, na kumusembia muizujwe na lutwarijo lwa kukunda kwakwe ghati ya kucha kwose na kutwarija kwa ngoma,

¹⁰ musele sandu imwinare Mzuri hena kuiseja kwose, mukigera ndunda ghati ya ndima yedi yose, na mukineta ghati ya lutwarijo lwa Izuwa:

¹¹ mukidindijwa na zinya yose, hena luidimo lwa kirumi kwakwe, hena lugumirio lose na kutikana hamwe na kuizihirwa;

¹² mukimwanjela Apa, etuosha kuinarwa kushanganya uhoja wa weshenete weoho ghati ya kyangaji;

¹³ etukijie kufuma zinya ya kija, akatusamija mtano ufumwa wa Mwana wa lukundo lwakwe;

¹⁴ na ghati yakwe tuna lukombolo lwetu, lushighio lwa ng’oki jetu:

¹⁵ eye ni mwa ya Izuwa asiwonwe, mbele wa kyose kilungiwe;

¹⁶ amu ghati yakwe vyose vilungiwe, wanga na masangeni, vindu viwonwa na visiwonwa, kwakicha ni viikayo‐vya‐kifumwa, kana maitorio, kana mabohio, kana mawuzinya: vyose vilungiwe hena ye, na hakwe;

¹⁷ Na ye evirongoria vyose, na vyose vyaoka ghati yakwe.

¹⁸ Na ye ni mtwi wa muri, kanisa; eye kuwoka, mbele wa kufuma wefwie; nesa ghati ya vyose aoke wa kuwoka.

¹⁹ Amu kimwiseje Apa, ti kuizua kwose kuikae hakwe;

²⁰ na hena ye avikundanya vyose hakwe mwenye, ekiareha luworo hena sakame ya msalaba wakwe; hena ye, naghamba, kwakicha vindu vioho masangeni, kana vindu vioho wanga.

²¹ Na unywi, muokie kae mwatanjwa na maring’a lusaroni henyu ghati ya ndima jenyu mbiwi,

²² kake ingeriaha emukundanya ghati ya muri wa nyama yakwe hena kifwa, amuwike mushenete na musina kirema, na musina linganyo msongorana wakwe:

²³ ikioka mwaikaa ghati ya luitikijo, mujengwe nezo na muduwie, na musiwushijwe kufuma luing’idaki lwa anjili muisikie, itindwe ghati ya kyose kilungiwe si ya majumbi; na ya anjili ii mi Paulo nikaoshwa mhiri.

²⁴ Ingeriaha naizihirwa ghati ya maluwawo mangu hena lwenyu, na naizuja hena mbai yangu kila kiduhuka kya maluwawo makwe Kristo ghati ya muri wangu hena lwa muri wakwe, egho kanisa;

²⁵ wa anjili ii nikaoshwa mhiri, hena wuroti wa Izuwa niingiwe hena unywi, kukifisha kiteto kyakwe Izuwa,

²⁶ nikyo mbiso iwiswe hena magheri mose na marika mose: kake ingeriaha yawonyanywa hena weshenete wakwe,

²⁷ nawo awa Izuwa akaisejwa kuwatisiwija nikini wumazi wa kirumi kya mbiso ii ghati ya Mambare, niyo Kristo ghati yenyu, luing’idaki lwa kirumi:

²⁸ niye twamtinda, tukimwonja mundu ose na tukimlosha mundu ose ghati ya kucha kwose, nesa tumbike mundu ose eining’oi ghati ya Kristo:

²⁹ hena ii nahira na mi pia, nikiketa lunyarki hena kuhira kwakwe, kwahira ndeni yangu na zinya.