Hena Wafilipi 4 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo, wandwetu wekundike na wehetiwe nyami, luizihiro lwangu na lumerisia, imukeni huwo nezo ghati ya Mzuri, wakundwa wangu.

² Namsemba Euodia, na namsemba Suntuke, waoke wa lusaro lumwe ghati ya Mzuri.

³ Ee, nakuomba na we pia, mughenji wangu kididi, uwaghenje wache awa, amu wehirie hamwe na mi ghati ya anjili, hamwe na Klementi pia, na wahiri hamwe na mi weshighajike, mazina mawo meoho ghati ya chuo cha moo.

⁴ Izihirweni ghati ya Mzuri misi yose: nineghambawa, Izihirweni.

⁵ Wuhoo wenyu wutisiwike hena wandu wose.

⁶ Mzuri eoho afuhi. Musikurishe wasi deng’e: nde ghati ya vindu vyose hena kuomba na kusemba hamwe na kuanjela mawujanyo menyu matisiwike hakwe Izuwa.

⁷ Na luworo lwa Izuwa, lutolokele kutwarija kwose, lunejirinda ngoro jenyu na makusaro menyu ghati ya Kristo Yesu.

⁸ Kuidiwika, wandwetu, vyose evyo kididi, vyose evyo vya nganyi, vyose evyo vya singisi, vyose evyo vizerre, vyose evyo vya kukundika, vyose evyo vina mburi yedi; kwakicha uwedi uoho, kwakicha luisiso luoho, vigheshijieni vindu ivi.

⁹ Vila muviloshijwe mukaviuhia, mukavisikia, mukaviwona hangu, ivi keteni: na Izuwa wa luworo eneoka hamwe na unywi.

¹⁰ Kake naizihirwa muno ghati ya Mzuri, ti ingeriaha mwawawua makusaro menyu hena lwangu; ikioka ti kididi mukusare, kake musowie mwanya.

¹¹ Si ti nateta mburi ya kuwaiya kindu; amu nakulosha, ti na mikayie ila niikee nayo, hena ila kuhoia.

¹² Natisiwa kusejwa, na natisiwa pia kuongejiwa; ghati ya kindu kyose na ghati ya vindu vyose nakulosha kila kiwisiwe, na kuighuta na kusikia nzaa, na kuongejiwa na kuduhuka.

¹³ Naidima kuketa vindu vyose ghati yakwe ula enidindija.

¹⁴ Kake muketie nezo, ti muokie na ulungano ghati ya wasi wangu.

¹⁵ Na unywi wenye mwatisiwa pia, unywi Wafilipi, ti hena kuwoka kwa anjlli, nikinafume ghati ya Umakedoni, teliokie kanisa liokie na ulungano nami ghati ya vindu vya kuinga na kuuhia, nde unywi tiki:

¹⁶ amu mtano hala Thessaloniki muingije kandu kamwe na ka keri hena kuwaiya kwangu.

¹⁷ Si ti nakienda kiingijo; kake naenda ndunda ila ineta hena kutara kwenyu.

¹⁸ Kake nina vindu vyose, na naongejiwa: naighuta, nikiidiwa kuuhia hena Epafrodito vindu vizie kufuma henyu, mbungo ya kunyuka nezo, itasi likundike, la kumwiseja Izuwa.

¹⁹ Na Izuwa wangu enefisha kyose mukiwaiya hena wumazi wakwe ghati ya kirumi hena Kristo Yesu.

²⁰ Ingeriaha hena Izuwa wetu na Apa kirumi kioke ndarasi na ndarasi. Amen.

²¹ Mkezieni eshenete ose ghati ya Kristo Yesu. Wandu‐wa‐hetu weoho hamwe na mi wemukezia.

²² Weshenete wose wemukezia, muno wala weoho wa nyumba yakwe Kaisari.

²³ Mvono wakwe Mzuri Yesu Kristo uoke hamwe na ngoma yenyu.