Hena Wafilipi 3 - Sumu Yedi ya Isa Masiya 1906 Kitamo 1897 Malumbo 1905

¹ Kuidiwika, wandwetu, izihirweni ghati ya Mzuri. Kumutamia vindu vilavila, hangu si limana, kake henyu mashorota.

² Kuyoeni hena nguro, kuyoeni hena wahiri‐viwiwi, kuyoeni hena kuchwa.

³ Amu uswi tu kutawanwa, tuomba hena Ngoma ya Izuwa, na twakuisisa ghati ya Kristo Yesu, na totuitikija hena muri.

⁴ Kake mi mwenye naidima kuitikija mtano hena muri: kwakicha mundu ungi egheshijia kuitikija hena muri, mi kukela:

⁵ Nitawanwe musi wa kanane, wa mbare ya Israeli, wa iwee la Benyamini, Mwebrania wa Waebrania; hena mburi ya sheria, Mfarisayo;

⁶ hena mburi ya lunyarki, nikilikinya kanisa; hena mburi ya ngalo ioho ghati ya sheria, nisiwonwa kuoka na kutekwa.

⁷ Kake vila viokie mbucha hangu, ivi navitara lutesho hena Kristo.

⁸ Ee kididi, na navitara vyose kuoka na lutesho hena uwedi wa lutwarijo lwa Yesu Kristo Mzuri wangu: hena lwakwe niketiwe lutesho lwa vindu vyose, na navitara kuoka kitondo,

⁹ nesa nimbone Kristo, na niwonwe hakwe, nisina ngalo yangu mwenye, eyo ya sheria, nde ila eyo hena luitikijo lwa Kristo, ngalo eyo ya kufuma hakwe Izuwa hena luitikijo:

¹⁰ nesa nimtisiwe, na zinya ya luruko lwakwe, na ulungano wa maluwawo makwe, nikiarehwa hena fwana ya kifwa kyakwe:

¹¹ kwakicha ngea nilufikie luruko lwa wefwie.

¹² Si ti naidiwa kuwona, kana naidiwa kuining’oi: kake naratera, nesa ngea nigure ki a henakyo mi pia niguriwe na Kristo Yesu.

¹³ Wandwetu, sikutarami ti naidiwa kugura: kake kindu kimwe naketa, nikiviiwaa vindu vioho nyuma, na nikikuronga hena vila vioho msongorana wangu,

¹⁴ nakutata hena loiting’hena awahache ya kuitangwa kwa wanga kwakwe Izuwa ghati ya Kristo Yesu.

¹⁵ Hena lwa iyo uswi, wose tuining’oi, tuoke na lusaro sa ulu: na kwakicha ghati ya kindu akeye muna lusaro lwingi, mtano iki Izuwa enekijughua henyu:

¹⁶ kake, ghati ya kila twaidiwa kukufikia, hena kilakila na tusele pia.

¹⁷ Wandwetu, muoke watamaia wangu hamwe, na muwawenge wala wesele huwo sandu mutuhete uswi hena fwana.

¹⁸ Amu weingi wesela, nimburrie mburi yawo kandu keingi, na ingeriaha namburra nikiiya masoji, maring’a ma msalaba wakwe Kristo:

¹⁹ kuidiwika kwawo ni lutesho, Izuwa wawo ni ndeni, na kirumi kyawo ni ghati ya nguruna yawo, ewo wekusara vindu vya masangeni.

²⁰ Amu wunoti wetu wuoho wanga; na kufuma uko twainda Mukija, Mzuri Yesu Kristo:

²¹ eye enewawua muri wa wufaa wetu, nesa ufwanane na muri wa kirumi kyakwe hena kuhira kula henako eidima kugera vindu vyose si yakwe.