Hena Wafilipi 2 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo kwakicha ludindijo luoho ghati ya Kristo, kwakicha luduwijo ghati ya lukundo, kwakicha ulungano wa Ngoma, kwakicha malusario na malunini,

² kurijeni luizihiro lwangu, ti mwaoka wa lusaro lumwe, mukioka na lukundo lumwe, mukioka na ngoro mwe, na mukikusara kindu kimwe;

³ musikete kindu hena ngani nete hena kukuisisa wesho, kake ghati ya kinyenya kya lusaro mundu ose atare mughenji wedi kukela ye mwenye:

⁴ musiyoe mundu ose vindu vyakwe mwenye, nde mundu ose wenyu vindu vya waghenji.

⁵ Muoke na lusaro ulu ndeni henyu, luoho ghati ya Kristo Yesu pia:

⁶ eye, ekioka na mwa ya Izuwa, tekiwonie kuoka kindu kya kuzaria ti aringanane na Izuwa,

⁷ kake ekumimine, akauha mwa ya mzoro, ekiarehwa hena fwana ya wandu.

⁸ Na ekiwonwa ghati ya kuarehwa sa mundu, akakuseja akainga isikio mtano kifwa, ee, kifwa kya msalaba.

⁹ Nawa hena lwa iyo Izuwa emkwejie muno, akamwinga izina elo wanga ya mazina mose;

¹⁰ ti hena izina la Yesu ikunguro lose lidung’ute, la vindu vioho wanga na masangeni, na si ya masanga,

¹¹ na ti lumi lose lughambe ti Yesu Kristo ni Mzuri, hena kirumi kya Izuwa Apa.

¹² Huwora, wekundike wangu, sandu misi yose mwainga isikio, si sa magheri nioho henyu tiki, nde ingeriaha kukela muno magheri nisioho, luhirieni lukio lwenyu wenye na fole na kudedema;

¹³ amu ni Izuwa ehira ndeni henyu na kukunda na kuhira, hena luisejo lwakwe.

¹⁴ Keteni vindu vyose hesina manunuwiko na makanano: nesa muoke musina kutekwa na musina kunyamara,

¹⁵ waana wa Izuwa wesina kirema ghati ya ghati ya irika likodeke na ligolong’i, ghati yalo mwawonwa sa viangaji masangeni,

¹⁶ mukiwonyanya kiteto kya moo; nesa nioke na kindu kya kukuisisa hena musi wa Kristo, ti sidindikemi wesho, nete sihiriemi wesho.

¹⁷ Ee, na nikimiminika wanga ya itasi na luhirio lwa luitikijo lwenyu, naizihirwa, na naisejwa hamwe na unywi wose:

¹⁸ na hena nzia ii na unywi pia muizihirwe, na muisejwe hamwe na mi.

¹⁹ Kake naing’idaki ghati ya Mzuri Yesu kumwingija Timoteo henyu afuhi, nesa na mi pia nidindijwe, nikitisiwa mikayie yenyu.

²⁰ Amu sinami mundu wa ngoro sa ngoro yakwe, na eneyoa kididi mikayie yenyu.

²¹ Amu wose weenda vindu vyawo wenye, si vindu vyakwe Yesu Kristo.

²² Kake mwatisiwa luyowo ti, sandu mwana emhiria wawee, ni huwo enihirie mi ghati ya kuitoranya anjili.

²³ Hena lwa iyo naing’idaki kumwingija chwi, nikiidiwa kutisiwa nize ineoka hangu:

²⁴ kake naitikija ghati ya Mzuri ti mi mwenye pia nineza afuhi.

²⁵ Kake niwonie ti sina huwo kumuingijia Epafrodito, mdwetu na mhiri na asikari hamwe na mi, na mwondo wenyu na mhiri hena vindu niwaiya:

²⁶ amu eketie nyami hena unywi wose, akashiniwa muno, amu musikie ti ewajuwe:

²⁷ amu kididi ewajuwe afuhi na kufwa: kake Izuwa emsarie; nete si ye tiki, nde na mi pia, nisioke na wukiwa wanga ya wukiwa.

²⁸ Hena lwa iyo namwingija hena lunyarki, nesa, mukimbonawa, muizihirwe, na kushiniwa kwangu kuduhuke.

²⁹ Hena lwa iyo mwuhieni ghati ya Mzuri hena luizihiro lose; na muwagurie nganyi wandu sa ye:

³⁰ amu hena ndima ya Kristo esongerie kifwa, ekigera moo wakwe ndengeni nesa aete kindu kila kiduhuke ghati ya luhirio lwenyu hena lwangu.