Hena Waefeso 5 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo muoke watamaia Izuwa, sa waana wekundike;

² Na seleni ghati ya lukundo, sandu Kristo pia emkundie unywi, akakung’ola hena lwetu, itasi na ndaswa hena Izuwa hena mbungo ya kunyuka nezo.

³ Kake mbuya, na ikwe lose, na kulangwa, ivi visioke nete kurangwa henyu, sandu yawawe weshenete:

⁴ nete nguruna, nete kuteta kwa kutomoda, nete mayi, vindu visiinare, nde keba kuanjela.

⁵ Amu mwakitisiwa iki korokoro, ti tehena mketi‐mbuya, nete mwenye‐ikwe, nete mlangwa, eye mwombi‐sanamu, ena uhoja akeye ghati ya ufumwa wa Kristo na Izuwa.

⁶ Mundu asimukenge na viteto vihaya: amu hena vindu ivi oro ya Izuwa yaza wanga ya waana wa kugolong’a.

⁷ Hena lwa iyo musioke unywi washanga nawo;

⁸ amu kae muokie kija, kake ingeriaha kyangaji ghati ya Mzuri: seleni sa waana wa kyangaji

⁹ (amu ndunda ya kyangaji ni ghati ya uwedi wose na ngalo na kididi),

¹⁰ mukimwonyanya kila kyamwiseja Mzuri:

¹¹ na musioke na ulungano na ndima ja kija jisigere, nde keba mujibohie;

¹² amu vindu viketwe nawo hena mbiso ni nguruna mtano kuvighamba.

¹³ Kake vyose vikibohiwa vyawikwa raa hena kyangaji: amu kyose kyawika raa ni kyangaji.

¹⁴ Hena lwa iyo eghamba, Wuka, we ushinjie, uruke ghati ya wefwie, na Kristo enekuangaja.

¹⁵ Hena lwa iyo yoeni nezo nize mwasela, si sa wetomode, nde sa wechee:

¹⁶ mukikuzoria magheri, amu misi ni miwiwi.

¹⁷ Hena lwa iyo musitomode, nde twarijeni nikini Mzuri ekikundie.

¹⁸ Na musiengee na mvinyo, niho kitaghara kioho, nde muizujwe Ngoma;

¹⁹ mukiwurrana ghati ya malumbo na vivino na kuvina kwa ngoma, mukivina na mukimwarehia Mzuri ngori yedi na ngoro yenyu;

²⁰ mukimwanjela Izuwa, eye Apa misi yose hena vindu vyose hena izina la Mzuri wetu Yesu Kristo;

²¹ mukitumikiana unywi na unywi ghati ya kuondoka kwa Kristo.

²² Wache, muitoriwe na wome wenyu wenye, sa na Mzuri.

²³ Amu mume ni mtwi wa mche, sandu Kristo pia ni mtwi wa kanisa, mwenye ekioka mukija wa muri.

²⁴ Kake sandu kanisa laitoriwa ni Kristo, huwo na wache pia waitoriwe na wome wawo ghati ya vindu vyose.

²⁵ Wome, wakundeni wache wenyu, sandu na Kristo pia elikundie kanisa, akakung’ola hena lwakwe;

²⁶ nesa alishenetije, ekiidiwa kulizerrija na kuoja kwa mbombe hamwe na kiteto,

²⁷ nesa mwenye akuinge kanisa, la kirumi, lisina iwaa, nete ikorowano, nete kindu akeye sa iki; nde lioke lishenete na lisina kirema.

²⁸ Ni huwo yawawe wome kuwakunda wache wawo wenye sa miri yawo wenye. Ula emkundie mche wakwe ekukunda mwenye:

²⁹ amu tehenaho mundu deng’e esua nyama yakwe mwenye; kake eirisha na eirinda, sandu na Kristo pia kanisa;

³⁰ amu uswi marungo ma muri wakwe.

³¹ Hena kindu iki mundu enemshigha wawee na mee, na enegurana na mche wakwe; na wala weri weneoka muri mwe.

³² Mbiso ii ni mbaha: kake nateta mburi ya Kristo na kanisa.

³³ Kake unywi pia mundu ose amkunde mche wakwe mwenye sa ngoro yakwe mwenye; na mche amwondoke mume wakwe.