Hena Waefeso 4 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo mi, mchungwa wa Mzuri, namsemba musele sandu iinare ghati ya kuitangwa muitangiwe,

² na kinyenya kyose na wuhoo, na kugumiria, mukitikana na waghenji ghati ya lukundo;

³ mukiketa lunyarki kuugura umwe wa Ngoma ghati ya luchungo lwa luworo.

⁴ Hena muri mwe, na Ngoma mwe, sandu muitangwe ghati ya luing’idaki lumwe lwa kuitangwa kwenyu:

⁵ Mzuri mwe, luitikijo lumwe,

⁶ lubatizo lumwe, Izuwa mwe na Wawee wose, eye wanga ya vyose, na hena vyose, na ghati ya vyose.

⁷ Kake mundu ose wa hetu eingiwe mvono hena mng’ana wa kiingijo kya Kristo.

⁸ Hena lwa iyo eghamba, Ekinakwee wanga, egerie wuzoro wuzoroni, akawaingijia wandu viingijo.

⁹ (Na iki, Ekweie, nikini nde ti eseie pia mtano handu ha si ya masanga?

¹⁰ Ula eseie ni ulaula pia ekweie hae wanga ya majumbini mose, nesa aizuje vyose).

¹¹ Akawainga mondo kuoka waondo: na mondo, waroti; na mondo, waanjilisti;

¹² na mondo, warisha na walosha; hena kukurijwa kwa weshenete, hena ndima ya luhirio, hena kuujengia muri wakwe Kristo:

¹³ mtano twaufikia wose umwe wa luitikijo, na wa lutwarijo lwa Mwana wa Izuwa, mtano mundu mzima, mtano kighesho kya mng’ana wa kuizua kwakwe Kristo:

¹⁴ tusiokewa waana, tukiwiritwa uko na uko na tukitikwa na ngungu yose ya ichundo, hena ukeleki wa wandu, ghati ya ng’eno, hena mailejo ma kukenga;

¹⁵ nde tukiteta kididi ghati ya lukundo, tuehe ghati ya vyose mtano hakwe, eye mtwi, Kristo;

¹⁶ ghati yakwe muri ose uarehiwe na ulunganywe hena kila kietwe na irungo lose, hena kuhira kwa mng’ana kwa ifungu lose limwelimwe, uareha kuneta kwa muri hena kukujengia ghati ya lukundo.

¹⁷ Hena lwa iyo naghamba iki, na nashuhudia ghati ya Mzuri, musiselewa sa Mambare wesela pia, ghati ya mahaya ma lusaro lwawo.

¹⁸ Wekigerwa kija hena kucha kwawo, wekitanywa na moo wa Izuwa amu ya kusatisiwa kuoho hawo, amu ya kuguma kwa ngoro yawo:

¹⁹ na wekiwia, wekugera hena owiwi, kulihiria ikwe lose ghati ya malangwa.

²⁰ Kake unywi tomuloshijwe Kristo huwo;

²¹ ikioka ti mumsikie, mukaloshwa ghati yakwe, sa kididi ioho ghati ya Yesu:

²² ti muhambua, hena mburi ya mitongie yenyu ya kuwoka, mundu wa kae, enyamarika ghati ya malangwa ma kukenga;

²³ na ti muwawuwa ghati ya ngoma ya lusaro lwenyu,

²⁴ na mudoke mundu msha, eye hena mikayie ya Izuwa elungiwe ghati ya ngalo na wusheneto wa kididi.

²⁵ Hena lwa iyo, mukihambua maongo, teteni kididi mundu ose na walatya wakwe: amu tu marungo uswi hena uswi.

²⁶ Reghijeni, na musikete ng’oki: nzano isiseie oro yenyu:

²⁷ nete musimwinge Shetani mwanya.

²⁸ Ula ehiwiwe asihiwewa: kake keba aarehe ndima, ekihira na mikono yakwe kila ekyo kyedi, awone kuoka na kindu kya kumwinga ula ewaiya.

²⁹ Kiteto kiwoie kisifume ghati ya itumbu lenyu, nde ekyo kyedi hena kujengia sandu kuwaiya kuneoka, kiwone kuwainga mvono wala wesikia.

³⁰ Na usiinge kushiniwe Ngoma Mshenete wa Izuwa, ghati yakwe mugeriwe muhuri hena musi wa lukombolo.

³¹ Luwawo lose, na oro, na lureghijo, na kilozo, na kurigha, ivi viwikwe hae kufuma henyu, hamwe na tiri yose.

³² Na mukete vyedi unywi na unywi, muoke na ngoro inyoie, mukishighiana, sandu Izuwa pia ghati ya Kristo emushighie unywi.