Hena Waefeso 3 - Sumu Yedi ya Isa Masiya 1906 Kitamo 1897 Malumbo 1905

¹ Hena kindu iki mi Paulo, mchungwa wakwe Yesu Kristo hena lwa unywi Mambare,

² ikioka musikie mburi ya wurote wa mvono ula wa Izuwa niingiwe hena unywi;

³ ti hena ujughuo nitisiwijwe mbiso, sandu nitamie kuwoka hena viteto vifaa,

⁴ na hena ivi, mukivisoma, mwaidima kuwona kutwarija kwangu ghati ya mbiso ya Kristo;

⁵ wasitisiwijwa waana wa Adamu ghati ya marika mengi, sandu ingeriaha ijughuiwe hena waondo weshenete na waroti wakwe ghati ya Ngoma;

⁶ niyo, ti Mambare ni wahoji hamwe, na marungo ma muri hamwe, na washanga wa lutemiano hamwe ghati ya Kristo Yesu hena anjili,

⁷ na ya anjili ii nikaoshwa mhiri, hena kiingijo kya mvono ula wa Izuwa niingiwe hena kuhira kwa zinya yakwe.

⁸ Mi, mdongo kukela mdongo wa weshenete wose, niingiwe mvono uu, kuwatindia Mambare wumazi wusiendika wakwe Kristo;

⁹ na kuwaosha wandu wose kuwona nikini wurote wa mbiso iwiswe too magheri mose ghati ya Izuwa evilungie vyose;

¹⁰ nesa ingeriaha mabohio na mawuzinya ghati ya handu ha wanga matisiwijwe hena kanisa kucha kwakwe Izuwa eko kwa mbare nyingi,

¹¹ hena mburi ya ndarasi eilulie ghati ya Kristo Yesu Mzuri wetu:

¹² ghati yakwe tuna kukaria na nzia ya kumfikia ghati ya luing’idaki hena luitikijo lwakwe.

¹³ Hena lwa iyo namwomba musisokee hena mawasi mangu hena lwenyu, emo kirumi kyenyu.

¹⁴ Hena kindu iki namdung’utija makunguru mangu hena Apa,

¹⁵ ghati yakwe mbare yose wanga na masangeni yaingwa izina,

¹⁶ amuinge, hena wumazi wa kirumi kyakwe, mudindijwe na zinya hena Ngoma yakwe, ghati ya mundu wa ndeni;

¹⁷ Kristo aikae ngoroni henyu hena luitikijo: nesa unywi, mukioka na migi na maluwoko ghati ya lukundo,

¹⁸ muduwe kutwarija hamwe na weshenete wose kuarama na wueza na kutonga‐wanga na kutonga‐si,

¹⁹ na kutisiwa lukundo lwakwe Kristo, lukelie lutwarijo, muizujwe mtano kuizua kwose kwakwe Izuwa.

²⁰ Ingeriaha hena ula eidima kuhira munomuno kukela kyose twaomba kana twagheshijia, hena zinya ila yahira ndeni yetu,

²¹ hakwe kirumi ghati ya kanisa na ghati ya Kristo Yesu hena marika mose ndarasi na ndarasi. Amen.