Hena Waefeso 1 - Sumu Yedi ya Isa Masiya 1906 Kitamo 1897 Malumbo 1905

¹ Paulo, mwondo wa Kristo Yesu hena lu kundo lwa Izuwa, hena weshenete weoho Efeso, na waitikiji ghati ya Kristo Yesu:

² Mvono henyu na luworo kufuma Izuwa Apa wetu na Mzuri Yesu Kristo.

³ Atasiwe Izuwa na Wawee Mzuri wetu Yesu Kristo, etutasie na lutasio lose lwa Ngoma ghati ya handu ha wanga ghati ya Kristo:

⁴ sandu etusaghurie ghati yakwe kuwoka kwa luwoko lwa masanga, nesa tuoke weshenete na wesina kirema msongorana wakwe ghati ya lukundo:

⁵ ekituwika kuwoka hena kuoshwa waana hakwe hena Yesu Kristo, hena luisejo lwa lukundo lwakwe,

⁶ hena luisiso lwa kirumi kya mvono wakwe, etuingijie huwo ghati ya Mkundwa:

⁷ na ghati yakwe tuna lukombolo lwetu hena sakame yakwe, lushighio lwa matekwa metu, hena wumazi wa mvono wakwe,

⁸ eunetija hetu ghati ya kucha kwose na ng’eno,

⁹ ekitutisiwija mbiso ya lukundo lwakwe, hena luisejo lwakwe

¹⁰ eluluie hakwe hena kuarehia kufika kwa magheri, awunganye vindu vyose ghati ya Kristo, vindu vioho wanga na vindu vioho masengeni:

¹¹ ghati ya ula, naghamba, na ghati yakwe uswi pia tuoshwe uhoja, tukiwikwa kuwoka hena kulula kwakwe ula evihira vyose hena mburi ya lukundo lwakwe:

¹² nesa tuoke hena luisiso lwa kirumi kyakwe, uswi tuokie kuwoka tukimwing’idaki Kristo:

¹³ na ghati yakwe unywi pia, mukiidiwa kusikia kiteto kya kididi, anjili ya lukio lwenyu, — na ghati yakwe, mukiidiwa kuitikija, muwikwe muhuri ya Ngoma Mshenete ya lutemiano,

¹⁴ niyo marongojo ma uhoja wetu, hena lukombolo lwa kindu kyakwe mwenye, hena luisiso lwa kirumi kyakwe.

¹⁵ Hena kindu iki mi pia, nikisikia mburi ya luitikijo lwa Mzuri Yesu luoho ghati yenyu, na lukundo mulutete hena weshenete wose,

¹⁶ sishighami kuanjela hena lwenyu, nikimuranga ghati ya maluombo lwangu;

¹⁷ Izuwa wa Mzuri wetu Yesu Kristo, Apa wa kirumi, amuinge ngoma ya kucha na ujughuo ghati ya kumtisiwa;

¹⁸ Mukioka na meso ma ngoro yenyu meangajwa, nesa mutisiwe nikini luing’idaki lwa kuitanga kwakwe, nikini wumazi wa kirumi kya uhoja wakwe ghati ya weshenete,

¹⁹ na nikini ubaha ukelie wa zinya yakwe hetu uswi tuitikija, hena kuhira kula kwa zinya ya luidimo lwakwe,

²⁰ eluketie ghati ya Kristo, ekinamrushe kufuma wefwie, akamwikaja hena mkono wakwe wa kuume ghati ya handu ha wanga,

²¹ wanga muno kukela kuitoria kwose, na luidimo, na zinya, na ufumwa, na izina lose larangwa, si ghati ya masanga ama tiki, nde ghati ya mala meneza:

²² akavigera vyose si ya maghu makwe, akamwinga kuoka mtwi wanga ya vyose hena kanisa,

²³ nilo muri wakwe, kuizua kwakwe ula eviizuja vyose ghati ya vyose.