Hena Waebrania 9 - Sumu Yedi ya Isa Masiya 1906 Kitamo 1897 Malumbo 1905

¹ Na mtano aghanyo lila la kuwoka likaoka na mitongie ya luhirio, na heshenete hakwe, ha masanga ama.

² Amu liokie hema liarehiwe, la kuwoka, ndeni yakwe jikaoka taa, na meza, na luwonjo lwa mabumunda: heitangwa heshenete.

³ Na nyuma ya ikubukio la keri hema lila laitangwa Heshenete ha heshenete:

⁴ Heokie na chetezo cha thahabu, na safina ya aghanyo ifinikirwe mbai jose na thahabu, na ndeni yakwe nyungu ya thahabu ina manna, na isibo lakwe Harun elo lisheghushe, na maboho ma aghanyo;

⁵ na wanga yakwe makerubi ma nguma mekigera kivuri kiikayo kya lusario; na vindu ivi totuidima kuviteta kimwekimwe ingeriaha.

⁶ Nawa vindu ivi vikiidiwa kuarehiwa huwo, wakohani weingia ghati ya hema la kuwoka misi yose, wekiareha ndima ja luhirio;

⁷ kake ghati ya lila la keri mkohani mbaha tiki, kandu kamwe hena mwaka, si esina sakame, eing’ola hena lwakwe mwenye, na hena mateshanyo ma wandu:

⁸ Ngoma Mshenete ekikiwonja iki, ti nzia ya kuingia ghati ya heshenete teimeoshwa raa, magheri hema la kuwoka laimuka:

⁹ nilo fwanano hena magheri ma ingeriaha, na hena ili na viingijo na matasi mang’olwa, mesiidime, ghati ya vindu vya lusaro, kumwosha mwenye kuomba eirowili,

¹⁰ mekioka (hamwe na vindu vya kula na kunywa na maojo mengimengi) mitongie ya muri, mewikwa mtano magheri ma kuarehia.

¹¹ Kake Kristo ekiza mkohani mbaha wa vindu vyedi vikundie kuza, hena hema ibaha na liirowili la kukela, lisiarehwe na mikono, nikyo kughamba,

¹² si la kulungwa uku, nete hena sakame ya mbuji na ndama, nde hena sakame yakwe mwenye, eingie kamwe ghati ya heshenete, ekiidiwa kuwona lukombolo lwa ndarasi.

¹³ Amu kwakicha sakame ya mbuji na nzao, na maivu ma mori mekiwanyinyirria wala wena ikwe, mashenetija hena kuuzerrija muri:

¹⁴ nize sakame ya Kristo, eye hena Ngoma ya ndarasi ekung’olie mwenye esina kirema hena Izuma, ineneta kuizerrija ngoro yenyu ghati ya ndima jifwie nesa imtumikie Izuwa mwenye moo?

¹⁵ Na hena kindu iki ni mwingia‐ghati wa aghanyo isha, nesa kifwa kikiidiwika hena lukombolo lwa matekwa meokie si ya aghanyo la kuwoka, wala weitangwe wauhie lutemiano lwa uhojo wa ndarasi.

¹⁶ Amu handu aghanyo lioho, tekina huwo kuoka kifwa kyakwe ekiarehie.

¹⁷ Amu aghanyo lina zinya handu kifwa kioho: amu liidima kindu musi akeye magheri ula eliarehie eoho na moo?

¹⁸ hena lwa iyo lila la kuwoka teliwikwa lisina sakame.

¹⁹ Amu aghanyo lose likinaidiwe kutetwa na Musa masikioni ha wandu wose, hena sheria, euhie sakame ya ndama na mbuji jila, hamwe na mbombe na suffu ngundu na husopo, akakinyinyirria chuo, na wandu wose,

²⁰ ekighamba, Ii sakame ya aghanyo elo Izuwa eliaghanyie hena unywi.

²¹ Nawa lila hema na viya vyose vya luhirio evinyinyirie hena nzia ilaila. Na hena sheria,

²² naidima afuhi kughamba, vindu vyose vyazerrijwa na sakame, na hesina kuitisha sakame tehenaho luterio.

²³ Hena lwa iyo teiokie na huwo fwana ja vindu vioho wanga jizerrijwe na vindu ivi; nde vindu vya wanga vijenye na matasi ma kukela ivi.

²⁴ Amu Kristo teingiaye handu heshenete hearehiwe na mikono, ha kufwanana na hala ha kididi; nde ghati ya wanga njenye, awonwe ingeriaha msongorana wa wusho wa Izuwa hena lwetu:

²⁵ nete si nesa akung’ole mwenye kandu keingi; sandu mkohani mbaha eingie ghati ya heshenete mwaka hena mwaka ekioka na sakame esiyakwe mwenye:

²⁶ kwakicha si huwo teokie na huwo kuwawiwa kandu keingi too kuwoka kwa masanga: kake ingeriaha kamwe hena kuidiwika kwa magheri ewonjwa raa nesa awushije ng’oki hena kukung’ola mwenye itasi.

²⁷ Na sandu iwikwa hena wandu kufwa kandu kamwe, na kutera kwa iki wuchili:

²⁸ huwo Kristo pia, eking’olwa kandu kamwe atike ng’oki ja weingi, enewonwa kandu ka keri, esina ng’oki, hawo wemwindia, hena lukio.