Hena Waebrania 8 - Sumu Yedi ya Isa Masiya 1906 Kitamo 1897 Malumbo 1905

¹ Ghati ya vindu tuviteta kibaha ni iki: Tuna mkohani mbaha sa uu, eikee hena mkono wa kuume wa kiikayo kya Ubaha uoho wanga,

² mhiri wa heshenete, na wa hema la kididi, eliimushe Mzuri, nete si mundu.

³ Amu mkohani ose ewikwa nesa ang’ole na viingijo na matasi: huwo na mkohani uu tena huwo kuoka na kindu kya kung’ola.

⁴ Na kwakicha eoho masangeni, teokaye mkohani deng’e, amu wala weoho, wa kung’ola viingijo hena sheria:

⁵ Niwo wekitumikia kila ekyo fwana na kivuri kya vindu vya wanga, sandu Musa ewonjwa ni Izuwa ekinakunde kuliareha hema: amu, Yoa, eghamba, uviarehe vyose hena fwana ila uwonjwe nduwini.

⁶ Kake ingeriaha awona ndima ikelie, sandu ni mwenye kuingia ghati ya aghanyo likelie, liarehiwe wanga ya matemiano mekelie.

⁷ Amu kwakicha aghanyo lila la kuwoka liokie lisina kuteshanya, handu tehekiendwa hena la keri.

⁸ Amu ekiwona kuteshanya hawo, eghamba, Yoa, misi yaza, eteta Mzuri, ti nineareha aghanyo isha na nyumba ya Israeli na nyumba ya Yuda;

⁹ si hena aghanyo niliarehie na wawawee wawo, musi nikinawagure mkono niwatikie kufuma isanga la Misri; amu teweikeewo ghati ya aghanyo langu, na siwayoiemi, eteta Mzuri.

¹⁰ Amu ili nilo aghanyo nineliareha na nyumba ya Israeli Kutera kwa misi ila, eteta Mzuri: Ninejiwika sheria jangu ghati ya lusaro lwawo, Na wanga ya ngoro yawo ninejitama: Na nineoka Izuwa hawo, Nawo weneoka wandu hangu:

¹¹ Na teweneloshawo mundu ose mughenji wakwe, Na mundu ose mundwawo, wekiteta, Mtisiweni Mzuri:

¹² Amu wose wenenitisiwa, Kufuma mdongo mtano mbaha wawo. Amu nineoka na lusario hena matekwa mawo, Na ng’oki jawo sinejikumbukawa.

¹³ Ghati ya kuteta kwakwe, Aghanyo isha, aliosha lila la kuwoka lioke la kae. Kake lila la kae na lasakaa lasongeria kumerukia.