Hena Waebrania 7 - Sumu Yedi ya Isa Masiya 1906 Kitamo 1897 Malumbo 1905

¹ Amu uu Melkizedeki, mfumwa wa Salem, mkohani wa Izuwa eye wanga ya vyose, etorana na Ibrahimu ekihunduka kufuma kukoma wafumwa wala, akamtasia,

² na ye Ibrahimu emgawie ifungu la ikumi la vyose (ekioka kuwoka, hena kugharushwa, Mfumwa wa ngalo, na ikwade pia Mfumwa wa Salem, nikyo, Mfumwa wa luworo;

³ esina wawee, esina mee, esina ndaliwa, esina nete kuwoka kwa misi nete kuidiwika kwa kukia, nde efwananijwa na Mwana wa Izuwa), eikaa mkohani asiiting’o.

⁴ Gheshijieni ingeriaha nize mundu uu eokie mbaha, hakwe Ibrahimu, mku, eng’olie ifungu la ikumi ghati ya matahwa medi.

⁵ Na kididi wala wa waana wa Lawi weuhia ndima ya mkohani weaghanywe wauhe ifungu la ikumi la vindu vya wandu, hena sheria nikyo, ghati ya wandwawo, wekioka awa wefuma na vikudi vya Ibrahimu:

⁶ kake ula, ndaliwa yakwe isitarwe ghati yawo, euha ifungu la ikumi la vindu vya Ibrahimu, na emtasia ula emahete matemiano.

⁷ Kake esina ngani akeye, mdongo etasiwa na mbaha.

⁸ Na aha wandu wenye kufwa weuhia ifungu la ikumi; nde hala mwe, eng’oliwa mburi ti eoho na moo.

⁹ Na huwo, kughamba ivi, hena nzia ya Ibrahimu, mtano Lawi, mwenye kuuhia ifungu la ikumi, aidiwa kuiha ifungu la ikumi;

¹⁰ amu eokie vikudini ha wawee, Melkizedeki ekinatorane naye.

¹¹ Haya kwakicha kuirowili kweokie hena nzia ya ukohani wa Ki‐Lawi (amu si yakwe wandu weiuhie sheria), nini kukundawa mkohani ungi afume hena mng’ana wa Melkizedeki, na asitarwe hena mng’ana wa Harun?

¹² Amu ukohani ukigharushwa, tokuna huwo kuoka kugharushwa kwa sheria.

¹³ Amu ula etetiwa vindu ivi ni wa mbare ingi, na ghati ya mbare ila tehenaho mundu eokie mhiri kisikoni.

¹⁴ Amu ni kya raa ti Mzuri wetu efumie ghati ya Yuda; mbare ii asiitetie Musa kiteto kya vindu vya wakohani.

¹⁵ Na kila kyaneta kuoka na raa, ikioka hena fwana ya Melkizedeki efumiria mkohani ungi,

¹⁶ earehwa, si hena sheria ya aghanyo la muri, nde hena zinya ya moo usiiting’o:

¹⁷ amu mburi yang’olwa, Niwe mkohani ndarasi hena mng’ana wa Melkizedeki.

¹⁸ Amu hena kuwika‐mbai kwa aghanyo larongoria amu ya wunana wakwe na kusabighambucha kwakwe

¹⁹ (amu sheria teiarehayo kindu kiirowili), na kuete wanga yakwe luing’idaki lwa kukela, na hena ulu twamsongeria Izuwa.

²⁰ Na ikioka ti si esina

²¹ kurara (amu wala kididi weoshwe wakohani wesina kiraro; kake ula na kiraro hena ula emtetia, Mzuri erarie nete tekundieye kuchwa‐muti, niwe mkohani ndarasi);

²² hena iyo Yesu aidiwa kuoka mkara wa aghanyo likelie.

²³ Na wala kididi weoshwe wakohani weingi hena kutara, amu wekindwa na kifwa wasiikae:

²⁴ kake ula, amu eikaa ndarasi, ena ukohani wakwe usiidime kugharuka.

²⁵ Na hena lwa iyo eidima kukija deng’e wala wemsongeria Izuwa hena ye, ekioka eoho na moo ndarasi awasembie.

²⁶ Amu yatuwe kuoka na mkohani sa uu, esheneta, esina ukeleki, esina ikwe, etanjwe na wenye ng’oki, na ekwejwa wanga kukela majumbini;

²⁷ asikunde musi hena musi, sa wakohani wala, kung’ola matasi, kuwoka, hena ng’oki jakwe mwenye, na ikwade, hena ng’oki ja wandu: amu iki ekiketie kamwe, ekinakung’ole mwenye.

²⁸ Amu sheria yawika wandu wakohani, wenye unana; kake kiteto kya kiraro kiokie nyuma ya sheria, kyawika Mwana, eirowili ndarasi.