Hena Waebrania 6 - Sumu Yedi ya Isa Masiya 1906 Kitamo 1897 Malumbo 1905

¹ Huwo tukishigha viteto vya kuwoka vya Kristo, na tutonge kajute hena kuirowili: tusiwikewa luwoko lwa kuchwa‐muti ghati ya ndima jifwie, na lwa luitikijo hena Izuwa,

² na malosho ma mabatizo, na ma kugera mikono, na ma luruko lwa wefwie, na ma wuchili wa ndarasi.

³ Na tuneketa iki, Izuwa akatuinga.

⁴ Amu hena mburi ya wala weangajwe kamwe, wakakichama kiingijo kya wanga, wakaoka washanga wa Ngoma Mshenete,

⁵ Wakakichama kiteto kyedi kya Izuwa, na zinya ja magheri ma akenya.

⁶ Ikwade wakagwa hae, tekiidimikawa kuwawawua ghati ya kuchwa‐muti; ikioka wekuwanikia keri Mwana wa Izuwa, na wemgera soni ya some.

⁷ Amu isanga lila lanywa mvua ilizia kandu keingi, na lang’ola vimeo vyedi hena wala weimiwe, lauhia lutasio lwa kufuma hakwe Izuwa:

⁸ kake likigera mivwa na midangu, lasuika, na lakunda kuseswa; kuidiwika kwakwe ni kushotwa.

⁹ Kake, wakundwa, twaitikija vindu vyedi kukela ivi hena unywi, na vindu vihete lukio, tukioka twateta huwo:

¹⁰ Amu Izuwa si mbiwi mtano kuiiwaa ndima yenyu na lukundo muluwonje hena lwa izina lakwe, mukioka muwahirie weshenete, na mtano yoo mwahira.

¹¹ Na twakunda mundu ose wenyu awonje lunyarki uloulo hena luing’idaki lwa kuizua mtano kuidiwika:

¹² musioke wadoko, nde watamaiya wala wemahoja matemiano hena kuitikija na kugumiria.

¹³ Amu Izuwa ekinang’ole lutemiano hena Ibrahimu, ikioka teidimaye kurara hena mbaha kukela, ekurariye mwenye,

¹⁴ ekighamba, Kididi ghati ya kutasia ninekutasia, na ghati ya kunetija ninekunetija.

¹⁵ Na huwo, ekiidiwa kugumiria nezo, akaluwona lutemiano.

¹⁶ Amu wandu werara hena ula mbaha: na ghati ya ngani yawo yose kiraro ni kya kuidiwika hena kudindija.

¹⁷ Na huwo Izuwa, ekikunda kuneta kuwawonja wahoji lutemiano lwakwe nize mburi yakwe teigharuka, eingie ghati‐na‐ghati na kiraro:

¹⁸ nesa hena vindu viri visiidime kugharuka, ghati yavyo teidimika Izuwa achwe maongo, tuoke na ludindijo lubaha, uswi tumatuke hena mashorota tugure luing’idaki luwikiwe msongorana wetu;

¹⁹ elo tuluhete sa nanga ya ngoro, luing’idaki ludindie na lwa kuimuka na luingia mtano na handu ha nyuma ya ikubukio:

²⁰ niho, sa mrongoria, Yesu eingie hena lwetu, ekioka mkohani mbaha ndarasi hena mng’ana wa Melkizedeki.