Hena Waebrania 5 - Sumu Yedi ya Isa Masiya 1906 Kitamo 1897 Malumbo 1905

¹ Amu mkohani mbaha ose, ekiuhwa ghati ya wandu, awikwa hena wandu ghati ya vindu vya Izuwa, nesa ang’ole na viingijo na matasi hena ng’oki:

² Eye eidima kutikana mboha na wetomode na watekwa, amu na ye mwenye eoho ghati ya wunana,

³ na hena iyo tena huwo kung’ola hena ng’oki, sandu ewang’olia wandu, na huwo kukung’olia mwenye.

⁴ Kake tehenaho ekuuhia nganyi ii, nde ekiitangwa ni Izuwa, sandu Harun eitangwe.

⁵ Huwo na Kristo tekurumishe mwenye aoshwe mkohani mbaha, kake ula emburrie, Niwe Mwana wangu, Yoo nakuwona:

⁶ Sandu etetawa handu hengi, Niwe mkohani ndarasi, Hena mng’ana wa Melkisedeki.

⁷ Eye, misi ya muri wakwe, eking’ola maluombo na malusembo hamwe na kuiya kubaha na masoji, hakwe eidime kumkija ghati ya kifwa, na ekisikiwa amu ya kuondoka kwakwe kwedi.

⁸ Ekioka Mwana, eloshwa kuinga‐isikio hena vila ewawiwa:

⁹ Na ekioshwa eirowili akaoka hena wose wemwinga isikio mwarehia lukio lwa ndarasi;

¹⁰ eitangwa ni Izuwa mkohani hena mng’ana wa Melkisedeki.

¹¹ Na tuna vindu vingi vya kuteta vya mburi yakwe, na vidindie vya kutisiwija,

¹² mukioka mutomode ghati ya kusikia. Amu ikioka hena magheri yambe kuoka walosha, mukundiewa mundu amloshe maluwoko ma kuwoka ma mitinda ya Izuwa; na mwaoka wakundi mavee, nete si kijo kidindie.

¹³ Amu ose euhia mavee ni mundu esitisiwe kiteto kya ngalo; amu ni ngerengere.

¹⁴ Kake kijo kidindie ni hena wandu wazima, niwo wala weokie na malusaro mawo maloshwa na kuhiria, kutwarija vyedi na viwiwi.