Hena Waebrania 3 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo, wandwetu weshenete, washanganya kuitangwa kwa wanga, kusareni Mwondo na Mkohani mbaha wa lughambo lwetu, ye Yesu;

² eye eokie mwitikiji hena ula emwarehie, sandu na Musa ghati ya nyumba yakwe yose.

³ Amu egheshijiwa ti yambe kirumi kukela Musa, sandu ula ejengie nyumba ena nganyi kukela nyumba.

⁴ Amu nyumba yose yajengwa ni mundu: kake ula ejenga vyose ni Izuwa.

⁵ Na Musa kididi eokie mwitikiji ghati ya nyumba yakwe yose sa mzoro, hena mburi ya vindu vila vikundie ikwade kutetwa;

⁶ kake Kristo sa mwana, wanga ya nyumba yakwe; na nyumba yakwe ni uswi, tukigura nezo kukaria kwetu na kukuisisa kwa luing’idaki lwetu mtano kuidiwika.

⁷ Hena lwa iyo, sandu Ngoma Mshenete eteta. Yoo mukilisikia ighonda lakwe,

⁸ Musijigumije ngoro jenyu, sa ghati ya kuakija oro, Sa hena musi wa kugheshwa shighati,

⁹ Wawaweo wenyu wekinanigheshe hena kuniyoa. Wakajiwona ndima jangu miaka makumanne.

¹⁰ Hena lwa iyo nikaregija na irika ili, Nikaghamba, Wetekwa misi yose ngoroni hawo: Kake tewetisiwewo nzia jangu;

¹¹ Sandu nirarie ghati ya oro yangu, Wasiingie ghati ya lusoghoko lwangu.

¹² Kuyoeni, wandwetu, isioke ngea ghati ya mundu wa henyu ngoro mbiwi ya kusaitikija ghati ya kumshigha Izuwa mwenye moo:

¹³ kake mutindiane musi hena musi magheri yaitangwa yoo: mundu wa henyu akeye asigumijwe hena ukeleki wa ng’oki:

¹⁴ amu twaoka washanga wa Kristo, tukigura kuwoka kwa luing’idaki lwetu nezo mtano kuidiwika:

¹⁵ magheri itetiwe, Yoo mukilisikia ighonda lakwe, Musijigumije ngoro jenyu, sa ghati ya kuakija oro.

¹⁶ Amu niwani, wekisikia, weakija oro? siwo wose wefumie na Misri hena Musa?

¹⁷ Na ereghije nawo niwani miaka makumanne? siwo wala weketie ng’oki, vimba vyawo vigwie shighati?

¹⁸ Na ewararie niwani wasiingie ghati ya lusoghoko lwakwe, nde wala wegolong’e?

¹⁹ Na twawona ti teweidimewo kuingia amu ya kusaitikija.