Hena Waebrania 2 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo yatuwe kuneta kuvisikia nezo vindu visikiwe, tusioke ngea wenye kutikwa hae.

² Amu kwakicha kiteto kitetiwe na malaika kiokie kyadinda, na kutekwa kwose na kugolong’a kukauhia wuesi wa ngalo:

³ nize tunepughunyuka uswi, tukitihia lukio lubaha sa ulu? elu lukitetwa kuwoka hena Mzuri, lukadindijwa hetu na wala wesikie:

⁴ Izuwa naye ekishuhudia hamwe nawo, na hena maluwano na marighio, na hena zinya jingijingi, na hena viingijo vya Ngoma Mshenete, hena kila ekikundie mwenye.

⁵ Amu tewikaye masanga ma akenya si ya malaika, mala tumateta.

⁶ Kake hena mwe eng’ola mburi handu ekighamba, Nikini mundu, ti umkumbuka? Kana mwana wa mundu, ti umzie?

⁷ Umwarehie mdongo kadongo kukela malaika; Umgerie lumerisia lwa kirumi na nganyi, Ukambika wanga ya ndima ja mikono yako:

⁸ Ukawika vindu vyose si ya maghu makwe. Amu ghati ya kuwika vindu vyose si yakwe, teshighaye kindu kisioho si yakwe. Kake ingeriaha totumewona vindu vyose viwikwa si yakwe.

⁹ Kake twamyoa ula earehiwe mdongo kadongo kukela malaika, ye Yesu, amu ya kuwawiwa kwa kifwa ewikwa lumerisia lwa kirumi na nganyi, nesa hena mvono wa Izuwa achame kifwa hena mundu ose.

¹⁰ Amu yambe ula, hena ye vindu vyose vyaoka, na ghati yakwe vindu vyose vyaoka, ekiete waana weingi hena kirumi, kushenetija mbaha wa lukio lwawo hena maluwawo.

¹¹ Amu na ula eshenetija na wala weshenetijwa wose ni wa mwe: amu ya iyo tegurwaye ni soni ekiwaitanga wandwawo,

¹² ekighamba, Ninelitinda izina lako hena wandwetu, Ghati na ghati ya wunganyiko ninevina luisiso lwako.

¹³ Nawa, Ninembikia luitikijo lwangu. Nawa, Yoa, mi na waana Izuwa eniingie.

¹⁴ Huwo amu waana weshanganya sakame na muri, na ye mwenye akashanganya vilavila huwo: nesa hena kifwa amnyamare ula eokie na zinya ya kifwa, niye Shetani:

¹⁵ na awakije wose wala weokie hena fole ya kifwa misi yose ya kukia kwawo ghati ya wuzoro.

¹⁶ Amu kididi teguraye wa malaika, nde egura wa mkuju wa Ibrahimu.

¹⁷ Huwo yambe ghati ya vindu vyose kufwananijwa na wandwawo, nesa aoke mkohani mwenye lusario na luitikijo ghati ya vindu vya Izuwa, aarehe lukundanyo hena ng’oki ja wandu.

¹⁸ Amu hena kuwawiwa kwakwe mwenye ekigheshwa, eidima kuwakija wala wegheshwa.