Hena Waebrania 12 - Sumu Yedi ya Isa Masiya 1906 Kitamo 1897 Malumbo 1905

¹ Huwo na uswi pia, tukioka na ijumbi la mashahidi ibaha sa ili latujunguluka, tuwike mbai kyose kiemee, na ng’oki igurana muno na uswi, na tudindike hena kugumiria ghati ya kulelana kuwikwa msongorana wetu,

² tukimyoa Yesu, mwenye kuwoka na kukurija luitikijo lwetu, eye hena luizihiro luwikwa msongorana wakwe etikane na msalaba, ekidaa nguruna, na eikaa si hena mkono wa kuume wa kiikayo kya Izuwa.

³ Amu mgheshijieni ula etikana na kulelana sa uku kwa wenye ng’oki wanga yawo wenye, musibundike, mukisokea ngoroni henyu.

⁴ Tomumebighana mtano sakame, mukilelana na ng’oki:

⁵ na mwaliiwaa tindo, lateta na unywi sa waana, Mwana wangu, usidae kubigha kwa Mzuri, nete usisokee ukidewerwa naye:

⁶ Amu Mzuri embigha ula emkundie, na emchakua mwana ose emwuhia.

⁷ Ni hena kubighwa mwagumiria; Izuwa emuketia sa waana: amu hena mwana uhi wawee esimbigha?

⁸ Kake mukioka tomuna kubighwa, wekioka wose weokie washanga, niho mwaoka waana‐wa‐mbuya, nete si waana wa kididi.

⁹ Nawa, tuokie na waapa wa muri wetu wa kutubigha, tukawainga nganyi: totuneneta muno kuitoriwa na Apa wa ngoma jetu, na kukia?

¹⁰ Amu wala kididi hena misi mifaa wetubighie sandu kiokie kyedi hawo; nde ye hena mbucha yetu, nesa tuoke washanga wa wusheneto wakwe.

¹¹ Kubighwa kwose kwawonwa ingeriaha kuoka si kwa kuizihirwa, nde kwa wukiwa: kake ikwade kwang’ola ndunda ya luworo hawo weloshwa nako, niyo ya ngalo.

¹² Hena lwa iyo rongesheni mikono ihomoke, na makunguru mewie:

¹³ muremaarehie maghu menyu nzia jirongeke, nesa kila kichingilike kisigharushwe kufuma nzieni, nde keba kihojwe.

¹⁴ Ratereni luworo na wandu wose, na lushenetijo, esina ulu tehenaho mundu enembona Mzuri.

¹⁵ Mukiyoa nezo mundu asiduhuke ghati ya mvono wa Izuwa; usioke mgi wa luwawo ukimea ukimugera wasi, na hena uu weingi wagerwa ikwe.

¹⁶ Asioke henyu mketi‐mbuya akeye, kana mwenye‐kurigha, sa Esau, eye hena ifungu imwe la kijo etaghie uhoja wakwe wa wumbele.

¹⁷ Amu mwatisiwa ti ekinakunde ikwade kuhoja lutasio, esuike, (amu tewonieye mwanya wa kuchwa‐muti), ekioka ekiluenda muno na masoji.

¹⁸ Amu tomufikia nduwi yaidima kukuwarwa, na ishie moto, na ina wujiru, na kija,

¹⁹ na ngungu, na ngori ya lughunda, na ighonda la viteto; na wala welisikie ighonda lila wakasemba kiteto kisitetwewa hawo:

²⁰ Amu teweidime kutikana na kila kiaghanywe, Kwakicha mtano nyama yakuwara nduwi, ikomwe na mabwe;

²¹ Na kila kiwoniwe kiokie kya kuitusha, mtano Musa etetie, Naituka muno na nadedema:

²² kake mwaifikia nduwi Sayuni, na kiongo kya Izuwa mwenye moo, Yerusalemi ya wanga, na malweriri ma malaika mesitarika,

²³ wunganyiko la wose na kanisa la wambele wetamwa wanga, na Izuwa Mchili wa wose, na ngoma ja wandu wenye‐singisi weoshwa wairowili,

²⁴ na Yesu mwingia‐ghati wa aghanyo isha, na sakame ya kunyinyirwa itetie vyedi kukela yakwe Habil.

²⁵ Kuyoeni musimsue ula eteta. Amu kwakicha wala tewepughunyukawo, wekimsua ula ewalosha masangeni, muno uswi totunepughunyuka, tukigharuka hae kufuma ula eteta kufuma wanga:

²⁶ Na magheri mala ighonda lakwe lidedemisha masanga: kake ingeriaha etemiana, ekighamba, Kandu kamwewa ninededemisha si masanga tiki, nde na wanga pia.

²⁷ Na kiteto iki, Kandu kamwewa, kina mburi ya kuviwushija vindu vila videdemishwa, sandu ya vindu viarehike, nesa vindu vila visidedemishwe viikae.

²⁸ Hena lwa iyo, tukiuhia ufumwa usiidime kudedemishwa, tuoke na mvono, nesa hena uo tutumike ghati ya kumwiseja Izuwa na kugura nganyi na kuondoka:

²⁹ Amu Izuwa wetu ni moto ulie.