Hena Waebrania 11 - Sumu Yedi ya Isa Masiya 1906 Kitamo 1897 Malumbo 1905

¹ Luitikijo nilu kutisiwa‐dawu kwa vindu viing’idakiwe, lughesho lwa vindu visiwonwa.

² Amu hena ulu waghosi weng’oliwe mburi.

³ Hena luitikijo twatwarija ti masanga mearehiwe na kiteto kya Izuwa, na huwo kila kyawonwa tekiokie kiarehike kufuma vindu viwonwa.

⁴ Hena luitikijo Habil emng’olie Izuwa itasi ledi kukela lakwe Kain, na hena ulu eng’oliwe mburi ti eokie mwenye ngalo, Izuwa ekishuhudia wanga ya viingijo vyakwe: na hena ulu ekioka efwie, eoho eteta.

⁵ Hena luitikijo Enoki akasamijwa asiwone kifwa na tewonwaye, amu Izuwa emsamije: amu kuwoka kwa kusamijwa kwakwe eshuhudiwe ti eokie mwenye kumwiseja Izuwa.

⁶ Na hesina luitikijo tekiidimika kumwiseja: amu ula emzia Izuwa tenaye huwo kuitikija ti eoho, na ti ni mng’oli awahache wa wala wemwenda.

⁷ Hena luitikijo Nuhu, ekiwonjwa mburi ya vindu visimewonwa, ekioka mguri‐mbea, earehie safina la kuikija nyumba yakwe: na hena ulu emachilia masanga, akaoka mhoji ngalo ila ioho hena luitikijo.

⁸ Hena luitikijo Ibrahimu, ekinaitangwe, eingie isikio, afume mtano na handu ekundie kuuhia hena uhoja; akafuma, asitisiwe nihi etonga.

⁹ Hena luitikijo akaikaa ghati ya isanga la lutemiano, sa ghati ya isanga esilakwe mwenye, ekitua hemeni, hamwe na Isaak na Yakobo, wahoji hamwe naye wa lutemiano lulalula.

¹⁰ Amu ekiyoiye kiongo kina maluwoko, mjengo wakwe na mwarehia Izuwa.

¹¹ Hena luitikijo mtano Sarah mwenye akauhia zinya ya kuemejwa ekinaidiwe kuvetia magheri makwe, ekioka emgheshijie ula etemiane kuoka mwitikija:

¹² na hena lwa iyo kufuma mwe, na ye sa efwie, wakawoneka sa ndondo ja wanga hena wiingi, na sa mzangazi uoho kiwambareni ha bahari, usitarika.

¹³ Awa wose wefwie ghati ya luitikijo, wasimauhie matemiano, nde wekimawona na wekimakezia kufuma hae, na wekighamba ti weokie wagheni na wazoki masangeni.

¹⁴ Amu wala weteta vindu sa ivi wewonyanya hena raa ti weenda isanga lawo wenye.

¹⁵ Na kwakicha weokie wekumbuke isanga lila welifumie, wekioka na mwanya wa kuhunduka.

¹⁶ Kake ingeriaha weakie isanga likelie, elo la wanga: hena lwa iyo Izuwa tegurwa ni soni hena lwawo, aitangwe Izuwa wawo: amu ewaarehie kiongo.

¹⁷ Hena luitikijo Ibrahimu, ekigheshwa, emng’olie Isaak: ee, ula emauhie matemiano na kuizihirwa eokie ekimng’ola mwana wakwe mjenye;

¹⁸ ye etetiwe, Ghati ya Isaak mkuju wako uneitangwa:

¹⁹ ekigheshijia ti Izuwa eidime kumrusha, mtano ghati ya wefwie; kufuma uko akamwuhiawa hena fwana.

²⁰ Hena luitikijo Isaak akawatasia Yakobo na Esau, mtano ghati ya vindu vya akenya.

²¹ Hena luitikijo Yakobo, ekinaoke kifweni, akawatasia waana wakwe Yusuf wose weri: akaomba, wanga ya mto wa isibo lakwe.

²² Hena luitikijo Yusuf, kuidiwika kwakwe kukinasongerie, akakutetia kuwotoka kwa waana wa Israeli: akang’ola aghanyo hena lwa mawindi makwe.

²³ Hena luitikijo Musa, ekinawoneke, ewisiwe mieji mitatu na warembona wakwe, amu wewonie ti eokie mwana wedi muno: nete teweituke aghanyo la mfumwa.

²⁴ Hena luitikijo Musa, ekinaehe esuie kuitangwa mwana wa mwana‐wa‐kiche wakwe Farao;

²⁵ ekisaghura keba kuketiwa viwiwi hamwe na wandu wa Izuwa, kukela kuoka na maisejo ma ng’oki hena magheri.

²⁶ Ekigheshijia nguruna ya Kristo mali mekelie sule ya Misri: amu eyoie kuihwa kwa awahache.

²⁷ Hena luitikijo akashigha Misri, asiituke oro ya mfumwa: amu egumirie, sa mwenye kumbona ula esiyoiwe.

²⁸ Hena luitikijo akaigura pasaka, na kunyinyirria kwa sakame, nesa mnyamari wa wambele asiwakuware.

²⁹ Hena luitikijo wakavetia ghati ya bahari ya Sham, sa handu heomie: na Wamisri wekighesha kuketa huwo wakamerukijwa.

³⁰ Hena luitikijo malusarigho ma Yeriko makagwa, mekinajungulukwe misi mifungate.

³¹ Hena luitikijo mshindi Rahab tetekieye hamwe na wala wegolong’e, ekioka ewauhie wazighani na luworo.

³² Na nikiniwa nitete? amu magheri temenifikia nikiteta mburi ya Gideon, Barak, Samson, Yefthah; ya Daudi na Samweli na waroti:

³³ ewo hena luitikijo welelie mawufumwa, wakaketa ngalo, wakawona matemiano, wakajiwa matumbu ma simba,

³⁴ wakajimisha zinya ya moto, wakapughunyuka hena kukaeha kwa muhandi, kufuma wunana wakaoshwa kudinda, wakaoka waaria ghati ya ngondo, wakamatusha malweriri ma wagheni.

³⁵ Wache wakauhia wefwie wawo hena luruko: na weingi wakawawijwa wasikunde lukio; nesa wawone luruko lukelie:

³⁶ Weingi wakaoka na maghesho ma kusolwa na kubighwa, ee, nawa ma minyororo na machungo:

³⁷ wakawiritiwa mabwe, wakatemwa na msomeno, wakagheshwa, wakakomwa na muhandi: Wakaangaanga wekidoka mikota ya maghonji, ya mbuji: wekioka wesina kindu,

³⁸ wenye wasi, weketiwa viwiwi (na awa temeinarwe masanga), wekiragaraga ghati ya mashighati na nduwi na mbako, na mawongo ma masanga.

³⁹ Na awa wose, weking’oliwa mburi ghati ya luitikijo lwawo,

⁴⁰ teweluuhiewo lutemiano, Izuwa ekioka etuarehie kindu kikelie, ti tusioho uswi awa wasiwone kukurijwa.