Hena Waebrania 10 - Sumu Yedi ya Isa Masiya 1906 Kitamo 1897 Malumbo 1905

¹ Amu sheria ikioka na kivuri kya vyedi vineza, na si fwana njenye ya vindu vila, teweidima na matasi malamala wemang’ola mwaka hena mwaka, wasiiting’o, kuwaosha wairowili wala wesongerra.

² Kwakicha si huwo, temekiiting’o kung’olwa, amu wenye kuomba, wekizerrijwa kamwe, teweokiewa na lusaro lwa kutisiwa ng’oki?

³ Kake ghati ya mala matasi, lukumbusho lwa ng’oki luarehiwe mwaka hena mwaka.

⁴ Amu tekiidimika ti sakame ya nzao na mbuji inewushija ng’oki.

⁵ Hena lwa iyo ekiza masangeni, eghamba, Itasi na king’olwa toukundiewe, Kake uniarehie muri;

⁶ Ghati ya matasi‐ma‐kushota mazima na ving’olwa hena ng’oki touwonawe luisejo:

⁷ Niho nighambie, Yoa, naza, (Ghati ya kikodo kya chuo natamiwa), Nesa nikete sandu ukundie, ee Izuwa.

⁸ Ekighamba wanga, Matasi na ving’olwa na matasi‐ma‐kushota mazima na ving’olwa hena ngo’ki toukundiewe, nete touwonawe luisejo ghati yamo (na ama mang’olwa hena sheria),

⁹ niho etetie, Yoa, naza nikete sandu ukundie. Eliwushija la kuwoka, nesa aliimushe la keri.

¹⁰ Na hena kukunda uku twashenetijwa hena kung’olwa muri wa Yesu Kristo kandu kamwe.

¹¹ Na mkohani ose kididi eimuke musi hena musi ekitumikia na eking’ola kandu keingi matasi malamala, mesiidime deng’e kuwushija ng’oki:

¹² Kake ula, ekinaidiwe kung’ola itasi imwe la ndarasi hena ng’oki akaikaa si ha mkono wa kuume wa Izuwa;

¹³ too ingeriaha ekiinda mtano maring’a makwe meneikameoshwe handu ha kuwika maghu makwe.

¹⁴ Amu hena itasi imwe ewaosha wala weshenetijwa wairowili ndarasi.

¹⁵ Na Ngoma Mshenete pia etung’olia mburi: amu kutera kwa kuteta kwakwe,

¹⁶ Ili nilo aghanyo nineliareha nawo Kutera kwa misi ila, eteta Mzuri; Ninejiwika sheria jangu ngoroni hawo, Na wanga ya lusaro ninejitama; ikwade eghamba,

¹⁷ Na ng’oki jawo na viwiwi vyawo sinekumkukawa.

¹⁸ Na handu luterio lwa iji, luoho, tehenahowa king’olwa hena ng’oki.

¹⁹ Hena lwa iyo, wandwetu, tukioka na kukaria kwa kuingia ghati ya heshenete sakame ya Yesu,

²⁰ hena nzia etuwikie, nzia sha na ya moo, ivetia ghati ya ikubukio, nikyo kughamba, muri wakwe;

²¹ na tukioka na mkohani mbaha wanga ya nyumba ya Izuma;

²² tusongerie na ngoro ya kididi ghati ya wiingi wa luitikijo, tukioka na ngoro jetu jinyinyirrwa ghati ya lusaro luwiwi, na muri wetu uojwe na mbombe izerre:

²³ tugure nezo lughambo lwa luing’idaki lwetu lusiduhuke; amu ula etemiane ni mwitikiji:

²⁴ na tukumbukane ghati ya kuwushanya hena lukundo na ndima jedi;

²⁵ tusishighe kuwunganyika kwetu handu hamwe, sa weingi wemanyeria kuketa, nde tukitindiana: na tukineta kuketa huwo, sandu mwawona musi wasongeria.

²⁶ Amu tukiketa ng’oki na tiri, kutera kwa kuuhia lutwarijo lwa kididi, telishighajikawa itasi hena ng’oki,

²⁷ nde kuyoiawuchili kwa kuitusha, na kukaeha kwa moto ula unewala wala wakanani.

²⁸ Mundu ewika mbai sheria ya Musa afwa esina kusariwa hena kiteto kya mashahidi weri kana watatu:

²⁹ nize, mwaghamba, enetarwa ti einarwe kuihijwa kwa kuneta ula, embata Mwana wa Izuwa, na egheshijia sakame ya aghanyo, hena iyo eshenetijwe, kuoka kindu kya misi yose, na eketie ng’ida Ngoma ya mvono?

³⁰ Amu twamtisiwa ula etetie, Kuiha‐lawi ni kwangu mi, nineiha. Nawa, Mzuri enewachilia wandu wakwe.

³¹ Ni kindu kya kuitusha kugwa mikononi ha Izuwa mwenye moo.

³² Kake kumbukeni misi ya kurongora, magheri, mukinaangajwe, muikee ghati ya kubighana kubaha kwa maluwawo:

³³ mbai mwe, mukioshwa kindu kya kuyowa na hena madewerano na hena mawasi; na mbai mwe, mukioka washanga wa wala weketiwe huwo.

³⁴ Amu muokie muwasarie wala weokie machungoni, mukauhia na kuizihirwa kutahwa mali menyu, mukitisiwa ti muna mali mekelie na ma kuikaa.

³⁵ Huwo musitaghe kukaria kwenyu, kuna awahache nyingi.

³⁶ Amu muwaiya lugumirio, nesa, mukiidiwa kuareha sandu Izuwa etundie, muluuhie lutemiano.

³⁷ Amu kutera kwa magheri madongo muno, Ula eza eneza, asisheshe.

³⁸ Kake mwenye‐ngalo wangu enekia hena luitikijo: Na ekihunduka nyuma, ngoro yangu teiisejwa naye.

³⁹ Kake uswi si wa wala wehunduka nyuma hena lutesho: nde wa wala wena luitikijo lwa kukija ngoma.