Hena Waebrania 1 - Sumu Yedi ya Isa Masiya 1906 Kitamo 1897 Malumbo 1905

¹ Izuwa, ekioka kae ewatetie waapa ghati ya waroti hena mafungu mengimengi na nzia jingijingi,

² kuidiwika kwa misi ii etutetie uswi ghati ya Mwana wakwe, embikie mhoji vindu vyose, na hena ye emaarehie masanga;

³ eye ekioka kuwaa kwa kirumi kyakwe, na fwana dawu ya kuoka kwakwe, na ekichughika vindu vyose na kiteto kya zinya yakwe, ekinaidiwe kuareha luzerrijo lwa ng’oki, eikee si hena mkono wa kuume wa Ubaha wanga:

⁴ ekiarehwa wedi kukela malaika huwo, sandu ehojie izina ledi kukela lawo.

⁵ Amu emtetie uhi wa malaika akeye, Niwe Mwana wangu, Nakuwona yoo? nawa, Nineoka hakwe Apa, Na eneoka hangu Mwana?

⁶ Nawa, ekimwete mbele masangeni eghamba, Malaika wose wa Izuwa wamwombe.

⁷ Na malaika ewatetia, Eye ewaosha malaika wakwe ngungu, Na wahiri wakwe luwerewere lwa moto:

⁸ kake Mwana emtetia, Kiikayo kyako, ee Izuwa, ni kya ndarasi na ndarasi; Na isibo la wuirowili ni isibo la ufumwa wako.

⁹ Ukundie ngalo, ukasua owiwi; Hena lwa iyo Izuwa, Izuwa wako, ekumiminia Mafuta ma luisejo wanga ya waghenji wako.

¹⁰ Na, We, Mzuri, magheri ma kuwoka umagerie maluwoko ma masanga, Na wanga ni ndima ja mikono wako.

¹¹ Iji jinetekateka: kake we uikaa: Jose jinesakaa sa suke‐ya‐kudoka:

¹² Na sa nguo unejikodakoda, Sa suke‐ya‐kudoka, na jinegharuka: Kake we uhuwohuwo, Na miaka yako teineiting’o.

¹³ Kake uhi wa malaika emtetie magheri akeye, Uikaa mkono wangu wa kuume, mtano nineikanioshe maring’a mako handu ha kugera maghu mako?

¹⁴ Siwo wose ngoma ja kutumikia, weingijwe kuhira hena lwa wala wenehoja lukio?