Hena Tito 3 - Sumu Yedi ya Isa Masiya 1906 Kitamo 1897 Malumbo 1905

¹ Uwakumbushe wawatumikie wenye kuitoria, wenye luidimo, wainge isikio,

² waarehiwe hena ndima yedi yose, wasimtetie mundu viwiwi, wasioke waketi iwoo, waoke wahoo, wekiwonyanya kinyenya kyose hena wandu wose.

³ Amu uswi pia tuokie kae wandu wetomode, wasiinge isikio, wegolong’e, wekengwa, wenye kutumikia malangwa mengimengi na maisejo, wenye kuikaa na tiri na kuneng’a weshishirrwa, wasuani.

⁴ Kake uwedi wa Izuwa Mukija wetu, na lukundo lwakwe hena wandu,

⁵ ukinawonwe, si hena ndima ja ngalo, tujiketie wenye, nde hena lusario lwakwe etukijie, hena kuojwa kwa kuwoneka keri, na hena kuoshwa washa hena Ngoma Mshenete,

⁶ etumiminie na kuora, hena Yesu Kristo Mukija wetu;

⁷ Nesa, tukiarehiwa ngalo na mvono wakwe, tuoshwe wahoji hena luing’idaki lwa moo wa ndarasi.

⁸ Kiteto iki kiitikijika, na ghati ya vindu ivi nikundie utete usina kuitalwa, nesa wala wemwitikija Izuwa wakuyoe waoke wahiri ndima jedi. Vindu ivi ni vyedi na vya mbucha hena wandu:

⁹ kake utesie mawujanyo ma kutomoda, na ndaliwa, na mawoo, na malelano ghati ya sheria; amu ama temena mbucha, na ni mahaya.

¹⁰ Mundu mweresi, kutera kwa kumtetia kwa kuwoka na kwa keri umsue;

¹¹ ukitisiwa ti mundu sa uu egharushwa viwiwi, na eketa ng’oki, ekikuchilia mwenye.

¹² Nikimwingija Artema hako, kana Tukiko, ukete lunyarki unizie ha Nikopoli; amu nagura kuikaa hala magheri ma kisie.

¹³ Uwafunye nezo Zena mwaaria wa sheria na Apolo, wasisowe kindu akeye.

¹⁴ Na wandu wetu wakuloshe kuhira ndima jedi hena mihiro iwaiwe, wasioke wandu wesigera.

¹⁵ Wose weoho nami wakukezia. Uwakezia wala wetukunda ghati ya luitikijo. Mvono uoke na unywi wose.