Hena Tito 2 - Sumu Yedi ya Isa Masiya 1906 Kitamo 1897 Malumbo 1905

¹ Kake we uvitete vindu viwe ichundo liduwie.

² Waghosi waoke wandu wasiengee, wahuji, wetishije, weduwie ghati ya luitikijo, ghati ya lukundo, ghati ya kugumiria:

³ na wacheku pia waoke wa mikayie ya nganyi, si wachunganji, wesiitorwe na mawa meingi, wenye kulosha vyedi:

⁴ nesa wawaloshe wache wadongo kuwakunda wome wawo, kuwakunda waana wawo,

⁵ kutisha, kuoka wazerre, wahiri kaa, wahoo, wekiitoriwa na wome wawo wenye, kiteto kya Izuwa kisitetiwe viwiwi:

⁶ na wabwange pia uwatindie waoke wetishije:

⁷ ghati ya vindu vyose ukikuwonyanya fwana ya ndima jedi; ghati ya ichundo lako ukiwonyanya kusanyamarika,

⁸ lutisho, kiteto kiduwie, kisiidime kuchiliwa: nesa ula ekanana agurwe ni soni, ekisowa kindu kiwiwi kya kukutetia.

⁹ Uwatindie wazoro waitoriwe na wazuri wawo wenye, na waoke wa kuiseja ghati ya vindu vyose;

¹⁰ si wenye lukombe, nde wenye kuwonyanya luitikijo lwedi: nesa walihambe ichundo lakwe Izuwa Mukija wetu ghati ya vindu vyose.

¹¹ Amu mvono wa Izuwa uwonwa, ukiwaetie wandu wose lukio,

¹² ukitulosha, ti, tukishigha wusui‐izuwa na malangwa ma masanga, tugure mitongie ya mng’ana na ngalo na wukundi‐izuwa ghati ya masanga ma ingeriaha:

¹³ tukiluyoia luing’idaki lutasiwa na lufumirio lwa kirumi lwa Izuwa mbaha na Mukija wetu Yesu Kristo:

¹⁴ eye ekung’olie hena lwetu, nesa atukombole ghati ya owiwi wose, na akuzerrijie wandu wa kuoka wakwe mwenye, wenye lunyarki ghati ya ndima jedi.

¹⁵ Vindu ivi uvitete, na utinde, na udewere na luidimo lose. Mundu akeye asikudae.