Hena Tito 1 - Sumu Yedi ya Isa Masiya 1906 Kitamo 1897 Malumbo 1905

¹ Paulo, mzoro wa Izuwa, na mwondo wa Yesu Kristo, hena luitikijo lwa wasaghurwa wakwe Izuwa, na kutisiwa kwa kididi kuoho ghati ya wukundi‐izuwa,

² ghati ya luing’idaki lwa moo wa ndarasi, na moo uu Izuwa, esiidima kuchwa maongo, etemiane kuwoka kwa magheri ma ndarasi;

³ kake magheri makwe ekiwonja kiteto kyakwe ghati ya mburi, niingiwe mi hena aghanyo la Izuwa Mukija wetu;

⁴ hena Tito, mwana wangu wa kididi hena vindu vya luitikijo lwa wose: Mvono na luworo kufuma hakwe Izuwa Apa na Yesu Kristo Mukija wetu.

⁵ Hena kindu iki nikushighie hala Krete, nesa uviarehe nezo vindu vishighajike, na uwike waghosi ghati ya kiongo kyose, sandu nikuaghanyie.

⁶ Mundu ekioka esitetwa kindu, mume wa mche mwe, mwenye waana weitikiji, wesilinganywa ti ni wa kuloza kana wa kugolong’a.

⁷ Amu askofu tena huwo kuoka esitetwa kindu, sa kirote kya Izuwa; esishera, esianguhe hena oro, si mwenye kitaghara na mawa, si mbighi, si mwenye kukunda mbucha mbiwi;

⁸ nde mtighi, mkundavyedi, etishije, mwenye singisi, esheneta, wa mng’ana;

⁹ mwenye kugura kiteto kiitikiji kioho hena malosho metu, nesa aidime na kutinda ghati ya ichundo liduwie, na kuwalela wala wekana.

¹⁰ Amu weingi weoho wegolong’e, wateti vihaya na wakengi, muno wala wa kutawanwa.

¹¹ Matumbu mawo temena huwo kufingwa; wenye kugharusha nyumba nzima, wekilosha vindu visiwawe, hena mbucha mbiwi.

¹² Mwe wawo, mroti wawo wenye, etetie, Wakrete misi yose wechwa‐maongo, nyama mbiwi, ndeni doko.

¹³ Shududa ili ni la kididi. Hena lwa iyo uwadewere vikaehe, nesa waduwe ghati ya luitikijo,

¹⁴ wasisikije malughano ma Kiyahudi, na maaghanyo ma wandu wegharuka hae kufuma kididi.

¹⁵ Hena wezerre vindu vyose vizerre: kake hawo wenye ikwe tehenaho kizerre; kake makusaro mawo na lusaro lwawo pia lina ikwe.

¹⁶ Weghamba ti wemtisiwa Izuwa; kake hena ndima jawo wemkania, wekioka weshishirrwa, na hena ndima yedi yose wesuike.