Hena Filemon 1 - Sumu Yedi ya Isa Masiya 1906 Kitamo 1897 Malumbo 1905

¹ Paulo, mchungwa wa Yesu Kristo, na Timoteo mundwetu, hena Filemon mkundwa wetu na mughenji ghati ya ndima,

² na hena Apfia rumburia, na hena Arkipo, na hena kanisa nyumbeni hako;

³ Mvono henyu na luworo kufuma Izuwa Apa wetu na Mzuri Yesu Kristo.

⁴ Namwanjela Izuwa wangu misi yose, nikikuranga ghati ya maluombo mangu,

⁵ nikisikia mburi ya lukundo lwako, na ya luitikijo uluhete hena Mzuri Yesu, na hena weshenete wose:

⁶ ti ulungano wa luitikijo lwako uhira nezo, ghati ya kuitisiwa kindu kyose kyedi kioho henyu, hena Kristo.

⁷ Amu niokie na luisejo lwingi na ludindijo ghati ya lukundo lwako, amu ngoro ja weshenete jasoghoshwa hena we, mundwetu.

⁸ Hena lwa iyo, nikioka na kukaria kwose ghati ya Kristo kukuaghanyia kindu kiwe,

⁹ kake hena lwa lukundo keba nisembe, nikioka sa Paulo mughosi, na ingeriaha mchungwa pia wa Kristo Yesu:

¹⁰ nakusemba hena lwa mwana wangu, nimbonie ghati ya machungo mangu, Onesimo,

¹¹ eye asioke kae wa mbucha hako, nde ingeriaha wa mbucha hako na hangu:

¹² nikamwingijawa hako, ye mwenye, nikyo, ngoro yangu mi:

¹³ nikaoka nikikunda kumkindia hangu, nesa hena lwako anihirie ghati ya machungo ma anjili:

¹⁴ kake nisina kiteto kyako sikundiemi kuteta kindu: nesa uwedi wako usioke hena kusingirijwa, nde hena kukunda kwa ngoro.

¹⁵ Amu ngea hena iyo etana na we magheri, nesa uoke naye ndarasi:

¹⁶ si sa mzorowa, nde kukela mzoro, mundwenyu mkundwa, na mi muno, kake nize muno hena we, na ghati ya muri na ghati ya Mzuri.

¹⁷ Huwo ukiniwona mi kuoka mshanga wako, umwuhie sa mi mwenye.

¹⁸ Kwakicha ekuketie viwiwi akeye, kana ena sile nawe, iki ukivike hangu:

¹⁹ mi Paulo natama na mkono wangu mwenye, Mi nineiha; nisikuwurre ti una sile nami mtano ya ngoro yako mwenye.

²⁰ Ee, mundwetu, nioke na luisejo lwa kufuma hako ghati ya Mzuri: unisoghoshe ngoro yangu ghati ya Mzuri.

²¹ Nikiitikija muno ti uneniinga isikio, nikutamie, nikitisiwa ti uneketa mtano kukela kila nikiteta.

²² Nawa uniarehie handu ha kuikaa; amu naing’idaki ti hena maluombo menyu ninemwingwa henyu.

²³ Epafra, mchungwa mughenji wangu ghati ya Kristo, akukezia;

²⁴ nawa Marko, Aristarko, Dema, Luka, wahiri‐ndima hamwe na mi.

²⁵ Mvono wa Mzuri wetu Yesu Kristo uoke na ngoro yako. Amen.