2 Hena Timoteo 4 - Sumu Yedi ya Isa Masiya 1906 Kitamo 1897 Malumbo 1905

¹ Nakuitanawa mesoni hakwe Izuwa, na ha Kristo Yesu, eye enawachilia wenye moo na wefwie, na hena kufumiria kwakwe na ufumwa wakwe;

² Tinda kiteto; uoke mhiri magheri ma kuwe na magheri ma kusawe; dewera, bohia, tindia, na kugumiria kwose na kulosha.

³ Amu magheri meneza tewenetikana na ichundo liduwie; kake wekioka na masikio ma kunyeera, wenekuwunganyia walosha hena malangwa mawo wenye;

⁴ na wenemagharusha masikio mawo kufuma kididi, na wenegharuka mbai hena malughano.

⁵ Kake we uoke wa mitongie yedi ghati ya vyose, gumiria viwiwi, hira ndima ya mwanjilisti, fisha luhirio lwako.

⁶ Amu mi ingeriaha namiminika, na magheri ma kuchunguwa kwangu masongerra.

⁷ Bighano lila ledi nabighana, mitongie naifisha, luitikijo nalugura:

⁸ too ingeriaha nawisiwa lumerisia lwa ngalo, na ulu Mzuri, mchili wa ngalo, eneniinga musi ula; na si mi tiki, nde na wala wose wekundie kufumiria kwakwe.

^9-10 Keta lunyarki kunizia afuhi: Amu Dema enitihie, ekikunda masanga ma ingeriaha, akatonga Thessaloniki; Kreske Galatia, Tito Dalmatia.

¹¹ Luka tiki eoho hamwe nami. Mwuhe Marko, uremwete nawe amu enighenja ghati ya luhirio.

^12-13 Kake Tukiko nimwingije Efeso. Joho lila nilishighie Troa hakwe Karpo, uliete ukiza, na vyuo, muno vila vya mikota.

¹⁴ Alexandro mshana‐usango eniketie viwiwi viingi: Mzuri enemhunduia hena ndima jakwe.

¹⁵ Na we ukuyoe pia hena uu; amu ekanana muno na viteto vyetu.

¹⁶ Ghati ya kukukania kwangu kwa kuwoka teokie mundu wa mbai yangu, kake wose wenitihie kisitarwe iki hawo.

¹⁷ Kake Mzuri eimuke mbai yangu, akanidindija; nesa hena mi mburi itindwe deng’e, nesa Mambare mose wasikie: nikakijwa ghati ya itumbu la simba.

¹⁸ Mzuri enenikija ghati ya ndima mbiwi yose, na enenikija mtano kuufikia ufumwa wakwe wa wanga: hakwe kirumi ndarasi na ndarasi. Amen.

¹⁹ Uwakezie Priska na Akula, na nyumba yakwe Onesiforo.

²⁰ Erasto eikee Korintho: Trofimo nimshighie Mileto ewajuwa.

²¹ Ukete lunyarki kuza kuwoka kwa kisie. Eubulo ekukezia, na Pude, na Lino, na Klaudia, nawo wandu‐wa‐hetu wose.

²² Mzuri aoke hamwe na ngoma yako. Mvono uoke na unywi.