2 Hena Timoteo 3 - Sumu Yedi ya Isa Masiya 1906 Kitamo 1897 Malumbo 1905

¹ Kake tisiwa iki, ti misi ya kuidiwika magheri ma wasi meneza.

² Amu wandu weneoka wekukunda wenye, wekundafetha, wekuisisa, wenye‐mafuti, warighi, wegolong’i hena warewawona, wesina‐haika,

³ esi‐washenete, wesina lukundo‐lwa‐lukishoni, wesiarehiana, wechunganji, wesina‐kukuima, wekaehe, wesikundavyedi.

⁴ Waresi, wang’ida, wekubaabaa, wekunda luisejo kukela wekunda Izuwa;

⁵ wekigura fwana ya wukundi‐izuwa, nde wekiikania zinya yakwe: kufuma awa pia ugharuke hae.

⁶ Amu wa awa ni wala wearufa nyumbeni, na weuha matahwa wache wetomode wenye ng’oki nyingi, wekitikwa na malangwa mengimengi,

⁷ wekiloshwa misi yose, na wasiidime kulufikia lutwarijo lwa kididi.

⁸ Na sandu Yana na Yambre welelane na Musa, huwo na awa pia welelana na kididi; wandu wewojwa ngoroni, na wa kusuika ghati ya vindu vya luitikijo.

⁹ Kake tewekatonge hajutewa: amu kutomoda kwawo kuneoka raa hena wandu wose, sandu na kutomoda kwa wala kuokie.

¹⁰ Kake we uokie ukiratera kulosha kwangu, mitongie, kulula, luitikijo, lugumirio, lukundo, kuting’iria, makinyo, maluwawo;

¹¹ vila vinigwie ghati ya Antiokia, Ikonio, Lustra; makinyo sa kini nigumirie: na ghati yamo mose Mzuri enikijie.

¹² Ee, na wose wekundie kuikaa na wukundi‐izuwa ghati ya Kristo Yesu wenewona makinyo.

¹³ Kake wandu wawiwi na wasawi weneneta ghati ya owiwi, wekikenga na wekikengwa.

¹⁴ Kake we uikae ghati ya vila uloshwe na utisiwijwe dawu, ukitisiwa na wandu ani uloshiwe;

¹⁵ na ti too ngerengere umatisiwe matamo meshenete meidima kukucheija hena lukio luoho ghati ya Kristo Yesu.

¹⁶ Kitamo kyose kihemiwa na Izuwa ni kyedi hena kulosha, hena kutisiwija matekwa, hena kuarehia, hena luitorio luoho ghati ya ngalo:

¹⁷ nesa mundu wa Izuwa akurijwe, earehiwe deng’e hena ndima yedi yose.