2 Hena Timoteo 2 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo we, mwana wangu, udindijwe ghati ya mvono uoho ghati ya Kristo Yesu.

² Na vila uvisikie hangu ghati ya mashahidi weingi, vila uviwike hena wandu waitikiji, ewo weneidima kulosha wengi pia.

³ Gumiria viwiwi hamwe, sa asikari wedi wakwe Yesu Kristo.

⁴ Tehenaho asikari ekitonga ngondo ekuingija ghati ya malweloli ma kukia uku; nesa amwiseje ula emtamie kuoka asikari.

⁵ Na mundu ekilelana, tegerwaye lumerisia, isioke elelane sandu iwe.

⁶ Mwimi ehira tena huwo kuoka wa‐kuwoka ghati ya kuviuhia vigeriwe.

⁷ Gheshijia kila nakiteta; amu Mzuri enekuinga kutwarija ghati ya vyose.

⁸ Umkumbuke Yesu Kristo, eruka ghati ya wefwie, wa mkuju wa Daudi, hena anjili yangu:

⁹ na ghati ya anjili ii nagumiria viwiwi mtano machungo, sa mketi‐viwiwi: kake kiteto kyakwe Izuwa tekichungiwe.

¹⁰ Hena lwa iyo navigumiria vyose hena lwa wasaghurwa, nesa woo pia wawone lukio luoho ghati ya Kristo Yesu hamwe na kirumi kya ndarasi.

¹¹ Kiteto kiitikijika: Amu kwakicha tufwie hamwe naye, tunekia pia hamwe naye:

¹² Kwakicha twagumiria, tuneitoria pia hamwe naye: kwakicha twamkania, ye pia enetukania uswi:

¹³ kwakicha totuna luitikijo, ye eikaa mwitikiji amu teidimaye kukukania mwenye.

¹⁴ Uwakumbushe vindu ivi, ukiwaitanawa mesoni ha Izuwa, wasilelane hena viteto, isina mbucha, hena kuwagharusha wala wesikia.

¹⁵ Ukete lunyarki kukuwika ha Izuwa mundu ekundike, mhiri asiwaiya kugurwa ni soni, ekikihiria nezo kiteto kya kididi.

¹⁶ Kake utesie maroghio mawiwi amu meneneta kutonga ghati ya wusui‐izuwa.

¹⁷ Na kiteto kyawo kinela sa kionda kya kuwoa: wa awa ni Humenayo na Fileto,

¹⁸ wandu awa wetekwa ghati ya kididi, wekighamba ti luruko lwaidiwa kuvetia, na wekigharusha luitikijo lwa mondo.

¹⁹ Kake luwoko ludindie lwa Izuwa lwaikaa, lukioka na muhuri ii, Mzuri ewatisiwa wala wakwe; na, Ose eranga izina lakwe Mzuri akutesie ha wusiwungalo.

²⁰ Kake ghati ya nyumba mbaha vioho viya si vya thahabu na fetha tiki, ndewa vya muti na vya teri; na mondo hena nganyi, na mondo hena wusinganyi.

²¹ Hena lwa iyo mundu ekikuzerrija ghati ya ivi, eneoka kiya hena nganyi, kishenetijwe, kiwe hena kuhiria kwakwe Mzuri, kiarehiwe hena ndima yedi yose.

²² Kake mamatuke malangwa ma kibwange, na ratera ngalo, luitikijo, lukundo, luworo, hamwe na wala wemwitangia Mzuri hena ngoro izerre.

²³ Kake mawujanyo ma kutomoda na kusatisiwa umasue, ukitisiwa ti maete mabighano.

²⁴ Na mzoro wa Mzuri tena huwo kushigha kubighana, na kuoka mhoo hena wose, echee ghati ya kulosha, mgumiria,

²⁵ ekilosha na wuhoo wala wekanana naye; nesa ngea Izuwa awainge kuchwa‐muti mtano lutwarijo lwa kididi,

²⁶ na wakuhundue kufuma izero la Shetani, wekinagurwe matahwa naye, hena kukunda kwakwe Izuwa.