1 Wakwe Yohana 5 - Sumu Yedi ya Isa Masiya 1906 Kitamo 1897 Malumbo 1905

¹ Ose akeye eitikija ti Yesu ni Kristo ewoneke ha Izuwa: na ose ekeye emkundie ula ewona, emkundie pia ula ewoneke hakwe.

² Hena iki twatisiwa ti twawakunda waana wa Izuwa, tukimkunda Izuwa, na tukimaareha maaghanyo makwe.

³ Amu ilo nilo lukundo lwa Izuwa, tumagure maaghanyo makwe; na maaghanyo makwe temeemeemo.

⁴ Amu ose akeye ewoneke ha Izuwa emalela masanga: na kulela niko uku kwalela masanga, luitikijo lwetu.

⁵ Na niani ula emalela masanga esire ula eitikija ti Yesu ni Mwana wa Izuwa?

⁶ Uu niye ula ezie hena mbombe na sakame, Yesu Kristo; si ghati ya mbombe tiki, nde ghati ya mbombe na ghati ya sakame.

⁷ Na ni Ngoma eshuhudia, amu Ngoma ni kididi.

⁸ Amu hena watatu weshuhudia, Ngoma, na mbombe, na sakame: na awa watatu ni ghati ya mwe.

⁹ Tukiuhia shuhuda la wandu, shuhuda la Izuwa lakela: amu shuhuda la Izuwa nilo ili,

¹⁰ elo eshuhudia hena mburi ya Mwana wakwe. Ula emwitikija Mwana wa Izuwa ena shuhuda ndeni yakwe:

¹¹ ula esimwitikija Izuwa emwosha wa‐maongo: amu teitikijaye shuhuda elo Izuwa eshuhudia hena mburi ya Mwana wakwe. Na shuhuda nilo ili, ti Izuwa etuingie moo wa ndarasi, na moo uu ni ghati ya Mwana wakwe.

¹² Ula emhete Mwana euhete moo; ula esina Mwana wa Izuwa, na moo teuheteye.

¹³ Ivi namtamia, nesa mutisiwe ti muna moo wa ndarasi, unywi muliitikija izina la Mwana wa Izuwa.

¹⁴ Na uku ni kukaria tuoho nako hena ye, ti, tukienda kindu sandu ekundie, etusikia.

¹⁵ Na tukitisiwa ti etusikia, kyose akeye twaenda, twatisiwa ti vila twamwomba tuoho navyo.

¹⁶ Mundu akeye ekimbona mundwawo eketa ng’oki esi‐ya‐kufwa, eneomba, na Izuwa enemwinga moo hena wala weketa ng’oki esi‐ya‐kufwa. Hena ng’oki eyo ya kufwa: hena mburi ya ii sighambami ti yambe kuomba.

¹⁷ Wusiwungalo wose ni ng’oki: na hena ng’oki esi‐ya‐kufwa.

¹⁸ Twatisiwa ti ose akeye ewoneke ha Izuwa teketaye ng’oki; kake ula ewoneke ha Izuwa emrinda, na ula mbiwi temkuwaraye.

¹⁹ Twatisiwa ti uswi tu wa Izuwa, na masanga mose meikaa ghati ya ula mbiwi.

²⁰ Na twatisiwa ti Mwana wa Izuwa aza, na atuinga kucha, ti twamtisiwa ula eye wa kididi, na tuoho ghati yakwe ula eye wa kididi, ghati ya Mwana wakwe Yesu Kristo. Uu niye Izuwa wa kididi na moo wa ndarasi.

²¹ Wujana, kurindeni hena sanamu.