1 Wakwe Yohana 4 - Sumu Yedi ya Isa Masiya 1906 Kitamo 1897 Malumbo 1905

¹ Wakundwa, musiitikije ngoma yose, kaka jigheshijeni ngoma, kwakicha ni ja Izuwa: amu waroti weingi wa maongo wefumiria masangeni.

² Hena iki mwatisiwa Ngoma ya Izuwa: ngoma yose eyo yaghamba ti Yesu Kristo eza ghati ya muri, ni ya Izuwa:

³ na ngoma yose eyo esimghamba Yesu, si ya Izuwa: na iyo ni ngoma ya ula mwantikristo, mburi yakwe muisikie ti yaza; na ingeriaha ioho masangeni yoo.

⁴ Unywi mu wa Izuwa, wujana, na mwajilela: amu ula eoho ghati yenyu ni mbaha kukela ula eoho masangeni.

⁵ Wo ni wa masanga: hena lwa iyo weviteta vya masanga, na masanga mewasikia.

⁶ Uswi tu wa Izuwa: ula eye emmaije Izuwa etusikia uswi; ula eye si wa Izuwa tetusikiaye. Hena iki twaitisiwa ngoma ya kididi na ngoma ya lutesho.

⁷ Wakundwa, tukundaneni: amu lukundo ni lwa Izuwa; na ose ekundie ewoneke ha Izuwa, na emmaije Izuwa.

⁸ Ula eye esikundie temmaijeye Izuwa; amu Izuwa ni lukundo.

⁹ Hena iki lukundo lwa Izuwa luwonyanywe raa ghati yetu, ti Izuwa emwingije Mwana wakwe mjenye masangeni, tuwone kukia hena ye.

¹⁰ Hena iki ni lukundo, si ti uswi tumkundie Izuwa, nde ti etukundie, akamwingija Mwana wakwe kuoka lukundanyo hena ng’oki jetu.

¹¹ Wakundwa, kwakicha Izuwa etukundie huwo, yatuwe uswi pia kukundana.

¹² Tehenaho mundu embonie Izuwa magheri akeye: tukikundana, Izuwa eikaa hetu, na lukundo lwakwe lwakurijwa hetu:

¹³ hena iyo twatisiwa ti twaikaa hakwe, na ye hetu, amu etuingie ya Ngoma yakwe.

¹⁴ Na twawona, na twashuhudia, ti Apa amwingija Mwana kuoka Mukija wa masanga.

¹⁵ Ose akeye eneghamba ti Yesu ni Mwana wa Izuwa, Izuwa eikaa hakwe, na ye ha Izuwa.

¹⁶ Na twatisiwa na twaitikija lukundo elo eluhete Izuwa hetu. Izuwa ni lukundo; na ula eikaa ghati ya lukundo eikaa ha Izuwa, na Izuwa eikaa hakwe.

¹⁷ Hena iki lukundo lwakurijwa hetu, nesa tuoke na kukaria hena musi wa wuchili; amu sandu ye eikee, huwo na uswi pia tuikee masangeni kunu.

¹⁸ Tehenaho fole ghati ya lukundo: kake lukundo luirowili lutagha fole some, amu fole ina luwawo; na ula efoleka teirowilika ghati ya lukundo.

¹⁹ Uswi twakunda, amu ye kuwoka etukundie uswi.

²⁰ Mundu ekighamba, Namkunda Izuwa, ekimsua mundwawo, ni wa maongo: amu ula esimkundie mundwawo eye embonie, teidimaye kumkunda Izuwa eye tembonaye.

²¹ Na aghanyo ili tulihete kufuma hakwe, ti ula emkundie Izuwa amkunde na mundwawo.