1 Wakwe Yohana 3 - Sumu Yedi ya Isa Masiya 1906 Kitamo 1897 Malumbo 1905

¹ Yoeni lukundo ani Api etuingie, tuitangwe waana na Izuwa: na ni huwo tuikee. Hena kindu iki masanga temetumaije, amu na ye tememmaije.

² Wakundwa, ingeriaha uswi tu waana wakwe Izuwa, na teimewonyanywa raa nikini tuneoka. Twatisiwa ti, eneikaawonyanywa raa, tunefwanana naye; amu tunembona sandu eikee.

³ Na ose ena luingi’daki ulu ghati yakwe ula, ekuzerrija, sandu na ula ezerre.

⁴ Ose eketa ng’oki eketa na wusui‐sheria pia: na ng’oki ni wusui‐sheria.

⁵ Na mwatisiwa ti ewonyanywa raa nesa awushije ng’oki; na ghati yakwe tehenaho ng’oki.

⁶ Ose akeye eikaa hakwe teketaye ng’oki: ose akeye eketa ng’oki tembonieye, nete temmaije.

⁷ Wujana, mundu asimkenge: ula eketa ngalo ni mwenye ngalo, sandu na ye ni mwenye ngalo:

⁸ ula eketa ng’oki ni wa shetani: amu shetani eketa ng’oki too kuwoka. Hena kindu iki Mwana wakwe Izuwa ewonyanywa raa, nesa ajinyamare ndima ja shetani.

⁹ Ose akeye ewoneke hakwe Izuwa teketaye ng’oki, amu mbeu yakwe yaikaa hakwe: na teidimaye kuketa ng’oki, amu ewoneke hakwe Izuwa.

¹⁰ Ghati ya iki waana wakwe Izuwa wewonyanywa raa, na waana wakwe shetani: ose akeye teketaye ngalo si wa Izuwa, nete ula esimkunda mundwawo.

¹¹ Amu ii niyo mburi muisikie too kuwoka, tukundane:

¹² si sa Kain eokie wa ula mbiwi, akamkoma mundwawo. Na hena lwa kina emkomie? Amu ndima jakwe jiokie mbiwi, najo ja mundwawo ja ngalo.

¹³ Msirighiwe, wandwetu, masanga mekimsua.

¹⁴ Twatisiwa ti twavetia kufuma kifwa mtano moo, amu tukundie wandu‐wa‐hetu. Ula esimkundie mundwawo eikee kifweni.

¹⁵ Ose akeye emsuie mundwawo ni mkomi: na mwatisiwa ti tehenaho mkomi ena moo wa ndarasi uikaa hakwe.

¹⁶ Hena iki twatisiwa lukundo, amu eng’olie moo wakwe hena lwetu: na yatuwe uswi kung’ola moo wetu hena lwa wandu‐wa‐hetu.

¹⁷ Kake ula ehete vindu vya masanga, na embona mundwawo ewaiya, na emchungia lusario lwakwe, nize lukundo lwakwe Izuwa lwaikaa hakwe ula?

¹⁸ Wujana, tusikunde ghati ya kiteto, nete hena lumi: nde ghati ya mhiro na kididi.

¹⁹ Hena iki tunetisiwa ti uswi tu wa kididi, na tunetisiwija ngoro yetu msongorana wakwe,

²⁰ ghati ya kyose akeye ngoro yetu yatuchilia; amu Izuwa ni mbaha kukela ngoro yetu, na etisiwa vyose.

²¹ Wakundwa, kwakicha ngoro yetu teituchilia, tuna kukaria hena Izuwa;

²² na kyose akeye twakienda, twauhia hakwe, amu twagura maaghanyo makwe, na twaviareha vindu vya kuiseja mesoni hakwe.

²³ Na ili nilo aghanyo lakwe, tuliitikije izina la Mwana wakwe Yesu Kristo, na tukundane, sandu etuingie aghanyo.

²⁴ Na ula emagura maaghanyo makwe eikaa hakwe, na ye hakwe ula. Na hena iki twatisiwa ti eikaa hetu, hena Ngoma etuingie.