1 Wakwe Yohana 2 - Sumu Yedi ya Isa Masiya 1906 Kitamo 1897 Malumbo 1905

¹ Wujana wangu, namtamia nesa musikete ng’oki. Kake mundu ekiketa ng’oki, tuna mtusembia hakwe Apa, Yesu Kristo mwenye ngalo;

² naye niye lukundanyo lwa ng’oki jetu; nete si hena jetu tiki, nde na ja masanga mose.

³ Na huwu tumaije ti tummaije, tukimagura maaghanyo makwe.

⁴ Ula eteta, Nimmaije, asimagure maaghanyo makwe, ena maongo, na kididi teioho hakwe ula.

⁵ Kake ula eligura aghanyo lakwe, kididi lukundo lwa Izuwa lwakurijwa hakwe ula. Huwu twatisiwa tuoho hakwe:

⁶ ula eghamba ti eikaa hakwe, yambe mwenye kusela sandu naye eselie.

⁷ Wandwetu, simtamia aghanyo sha, nde lila la kae, mweoho nalo too kuwoka; aghanyo la kae ni kiteto mukisikie.

⁸ Aghanyo ishawa nimtamia, elo la kididi ghati yakwe na yenyu; amu kija kyavetia, na kyangaji kya kididi kyawaa ingeriaha.

⁹ Ula eghamba ti eoho kyangajini, naye emsuie mundwawo, eoho kijeni mtano ingeriaha.

¹⁰ Ula emkundie mundwawo eikaa kyangajini, na msadara tehenaho hakwe.

¹¹ Kake ula emsuie mundwawo eoho kijeni, na esela kijeni, na tetisiwaye etongahi, amu kija kyamjiwa meso.

¹² Namtamia, wujana, amu mwashighiwa ng’oki jenyu hena lwa izina lakwe.

¹³ Namtamia unywi, waapa, amu mummaije ula eye eokie too kuwoka. Namtamia unywi, wabwange, amu mwamlela mbiwi. Nimtamie unywi, wujana, amu mummaije Apa.

¹⁴ Nimtamie unywi, waapa, amu mummaije ula eye eokie too kuwoka. Nimtamie unywi, wabwange, amu mmbaaria, na kiteto kya Izuwa kiikaa henyu, na mwamlela mbiwi.

¹⁵ Msimakunde masanga, nete vindu vioho masangeni. Mundu ekimakunda masanga, lukundo lwa Apa toluoho hakwe.

¹⁶ Amu kyose kioho masangeni, kulangwa kwa muri, na kulangwa kwa meso, na lung’endo lwa moo, sikyo kya Apa, nde nikyo kya masanga.

¹⁷ Namo masanga mevetia, na kulangwa kwamo, kake ula eketa sandu ekundie Izuwa eikaa ndarasi.

¹⁸ Wujana, ni saa ya kuidiwika: na sandu musikie ti mwantikristo eza, mtano ingeriaha weidiwa kuwuka waantikristo weingi: hena iyo twatisiwa ti ni saa ya kuidiwika.

¹⁹ Wefumie hetu, kake teweokiewo wa hetu: amu kwakicha weokie wa hetu kwakicha weikee hamwe na uswi: kake wefumie, nesa wawonyanywe raa ti wose teweokie wa hetu.

²⁰ Na unywi muna kugerwa‐mafuta hena Ula Mshenete, na mwatisiwa vyose.

²¹ Samtamia amu tomuitisiwa kididi, nde amu muitisiwa, na amu maongo mose temeoho kufuma kididi.

²² Niani ena maongo, esire ula ekana ti Yesu ni Kristo? Uu niye mwantikristo, eye emkana Apa na Mwana.

²³ Ose emkana Mwana, na Apa temheteye: ula emwitikija Mwana, na Apa emhete.

²⁴ Na unywi, kila mkisikie too kuwoka, kiikae henyu. Kikiikaa henyu kila mkisikie too kuwoka, na unywi muneikaa ghati ya Mwana, na ghati ya Apa.

²⁵ Na ulu nilu lutemiano etutemianie, moo wa ndarasi.

²⁶ Ivi nimutamie hena mburi ya wala wekundie kumutesha.

²⁷ Na unywi, kugerwa‐mafuta eko muuhie hakwe kwaikaa henyu, na tomuwaiya mundu wa kumlosha: kake sandu kugerwa‐mafuta kwakwe kwamlosha mburi ya vindu vyose, na ni kwa kididi, nete si maongo, na sandu kumloshie, mwaikaa hakwe.

²⁸ Na ingeriaha, wujana, ikaeni hakwe; nesa, ekiwonyanywa raa, tuoke na kukaria, na tusigurwe na soni msongorana wakwe ghati ya mizie yakwe.

²⁹ Mukitisiwa ti ni wa ngalo, mwatisiwa ti mundu ose eketa ngalo ewoneka hakwe.