1 Wakwe Yohana 1 - Sumu Yedi ya Isa Masiya 1906 Kitamo 1897 Malumbo 1905

¹ Kila kiokie too kuwoka, tukisikie, tukiwonie hena meso metu, tukakiyoa, mikono yetu ikakibabata, hena mburi ya Kiteto kya moo

² (moo ukawonyanywa, na twawona, na twashuhudia, na twamtindia moo, wa ndarasi, ewo uokie hamwe na Apa, ukawonyanywa hetu);

³ kila tukiwonie tukakisikia twamtindia na unywi, nesa na unywi mbone kuoka washanga na uswi: ee, na shanga yetu na ya Apa na ya Mwana wakwe Yesu Kristo:

⁴ na ivi twavitama, nesa luizihiro lwenyu luizue.

⁵ Na ii niyo mburi tuisikie hakwe na twatinda henyu, ti Izuwa ni kyangaji, na kija hakwe tehenaho deng’e.

⁶ Tukighamba ti tuna shanga naye, na tukiselawa kijeni, twachwa‐maongo, nete totuketa ekyo kya kididi:

⁷ kake tukisela kyangajini, sandu naye eoho kyangajini, tushangarana uswi na uswi, na sakame yakwe Yesu Mwana wakwe ituzerrija ghati ya ng’oki yose.

⁸ Tukighamba ti totuna ng’oki, twakukenga, na kididi teioho hetu.

⁹ Tukijighamba ng’oki jetu, ye ni wa luitikijo na wa ngalo, atuwushijie ng’oki jetu, na atuzerrije ghati ya owiwi wose.

¹⁰ Tukighamba ti totuketie ng’oki, twamwosha ye wa maongo, na kiteto kyakwe tekioho hetu.