1 Hena Wakorintho 9 - Sumu Yedi ya Isa Masiya 1906 Kitamo 1897 Malumbo 1905

¹ Simi nisimzoro? simi mwondo? simboniemi Mzuri wetu Yesu? si unywi ndima yangu ghati ya Mzuri?

² Kwakicha hena wengi mi si mwondo, nde henyu nimi: amu muhuri ya wuondo wangu ni unywi ghati ya Mzuri.

³ Viteto vyangu vya kunirinda hena wala wenichilia ni ivi.

⁴ Totuna luidimo lwa kula na kunywa?

⁵ Totuna luidimo kutikana na mche mwitikiji, sa waondo weshighajike, na wandwawo Mzuri, na Kefa?

⁶ Kana mi tiki na Barnaba, totuna luidime kusahira ndima?

⁷ Niani egura ndima ya asikari hena mali makwe mwenye? niani ehanda mizabibu, asile ndunda yakwe? kana niani erisha ifio, asile ma mavee ma ifio?

⁸ Nateta ivi hena mitongie ya wandu? kana sheria teiteta huwo pia?

⁹ Amu itamiwe ghati ya sheria ya Musa, Usimchunge miomo ng’ombe ikibughutua. Izuwa ejirinda mtano ng’ombe?

¹⁰ Kana ekiteta hena lwetu deng’e? Ee, hena lwetu itamiwe, amu yambe ula eima aime ghati ya luing’i daki, na ula ebughutua, ekiing’idaki kuwona ngata yakwe.

¹¹ Tukioka tumuhandie vindu vya ngoma, ni kindu kibaha tukifindika vindu vyenyu vya muri?

¹² Wengi wekioka na ngata ghati ya luidimo ulu wanga yenyu, si uswi kukela? Kake uswi totuluhirie luidimo ulu; kake twatika vindu vyose, tusiigerie lukindo anjili ya Kristo.

¹³ Tomutisiwa ti wala wevihiria vindu vishenete wela vindu vya hekalu, na wala wekihiria kisiko weshanga na kisiko?

¹⁴ Na huwo Mzuri eaghanyie ti wala weitinda anjili waikajwe na vindu vya anjili.

¹⁵ Kake mi sivihirie vindu ivi deng’e: nete sitamami ivi nesa iarehwe huwo hangu: amu keba hangu kufwa, kukela mundu aarehe kukuisisa kwangu kuhaya.

¹⁶ Amu nikiitinda anjili, sinami kindu kya kukuisisia; amu nasingirijwa; amu wukiwa hangu, nisikaitinde anjili.

¹⁷ Amu nikiketa iki hena kukunda kwangu mwenye, nina awahache: kake kwakicha si hena kukunda kwangu mwenye, nawikiwa, wurote.

¹⁸ Na awahache yangu nikini? nikyo, nikitinda anjili, niing’ole anjili isina zora, na huwo nisiluhirie deng’e luidimo lwangu ghati ya anjili.

¹⁹ Amu nikioka nisimzoro ghati ya wandu wose, nakugera mwenye wuzoroni hena wose, nesa ninete kuwawona.

²⁰ Na hena Wayahudi nikaoka sa Myahudi, nesa niwawone Wayahudi; hena wala weoho si ya sheria, sa si ya sheria, nesa niwawone wala weoho si ya sheria;

²¹ hena wala wesina sheria, sa nisina sheria, si nisina sheria hena Izuwa, nde si ya sheria hena Kristo, nesa niwawone wala wesina sheria.

²² Hena wanana nikaoka mnana, nesa niwawone wanana: naoka vindu vyose hena wandu wose, nesa niwone hena nzia jose kukija mondo.

²³ Na naareha vindu vyose hena lwa anjili, nesa nioke mshanganya ghati yakwe.

²⁴ Tomutisiwa ti wala wedindika ghati ya stadio wedindika wose, kake mwe euhia awahache? Ni huwo dindikeni, mbone.

²⁵ Na mundu ose elelane ghati ya maseko ni wa mng’ana ghati ya vindu vyose. Na wala, nesa wauhie lumerisia lunyamarika; kake uswi lusinyamarike.

²⁶ Hena lwa iyo mi nadindika huwo, si sa mwenye kuitalwa; nabighana huwo, si sa mwenye kubigha mruki:

²⁷ kake nauwinya muri wangu, na nauete wuzoroni: isioke ngea, nikiidiwa kuwatindia wengi, mwenye nioke wa kusuika.