1 Hena Wakorintho 6 - Sumu Yedi ya Isa Masiya 1906 Kitamo 1897 Malumbo 1905

¹ Mundu wa henyu ekara, ekioka na kiteto wanga ya mughenji, kuchiliwa msongorana wawo wesina ngalo, na si msongorana wawo weshenete?

² Kana tomutisiwa ti weshenete wenemachilia masanga? na kwakicha masanga machiliwa na unywi, tomuidima kuareha machila madongo?

³ Tomutisiwa ti tunechilia malaika? muno kukela, vindu vya masanga ama?

⁴ Huwo kwakicha muna ndima ya kuchilia vindu vya masanga ama, muwawike kuoka wachili wala wedaiwe ghati ya kanisa?

⁵ Nakiteta iki nimugere soni. Nikyo iki, ti teidima kuwonwa henyu mundu mwe echee, eidima kuchwa chila ghati na ghati ya wandwawo,

⁶ kake mundu eenda chila hena mdwawo, na iki msongorana wawo wesiitikija?

⁷ Hai, ghati ya kindu iki mwaduhuka deng’e, ti muna machila unywi hena unywi. Nini mwasaketiwa viwiwi keba? nini mwasakengwa keba?

⁸ Hai, kake unywi wenye mwaketa viwiwi, na mwakenga, na iki ghati ya wandwenyu.

⁹ Kana tomutisiwa ti wesina‐ngalo teweneuhoja ufumwa wa Izuwa? Musikengwe; nete mketi‐mbuya, nete waombi‐sanamu, nete washindi, nete weng’enda, nete wekuketie viwiwi na wome,

¹⁰ nete wahiwi, nete welangwa, nete wenye kuengea, nete warighi, nete wasoki, weneuhoja ufumwa wa Izuwa.

¹¹ Na mondo wenyu weokie sa awa: kake muojiwe, kake mushenetijwe, kake muarehiwe ngalo hena izina la Mzuri Yesu Kristo, na hena Ngoma ya Izuwa wetu.

¹² Vyose si mbarian hangu: kake si vyose viwe. Vyose si mbarian hangu: kake mi sineitoriwa na kindu.

¹³ Vijo hena ndeni, na ndeni hena vijo: kake Izuwa enetesha na vila na iji. Kake muri si hena mbuya, nde hena Mzuri; na Mzuri hena muri:

¹⁴ na Izuwa embushie Mzuri, na enetuwusha uswi pia hena zinya yakwe.

¹⁵ Tomutisiwa ti miri yenyu ni marungo makwe Kristo? Huwo ninemauha marungo makwe Kristo, na kumaosha marungo ma mshindi? Kiwawe.

¹⁶ Kana tomutisiwa ti ula egurana na mshindi ni muri mwe? amu, Wala weri, eteta, weneoka muri mwe.

¹⁷ Kake ula egurana na Mzuri ni ngoma mwe.

¹⁸ Matukeni mbuya, Ng’oki yose mundu eketa ni some ya muri; kake ula eketa mbuya eketia ng’oki muri wakwe mwenye.

¹⁹ Kana tomutisiwa ti muri wenyu ni hekalu la Ngoma Mshenete ioho ndeni henyu, muiuhie kufuma hakwe Izuwa? nete unywi si mali menyu wenye:

²⁰ amu muzoriwe na zora: hena lwa iyo mrumisheni Izuwa ghati ya muri wenyu.