1 Hena Wakorintho 4 - Sumu Yedi ya Isa Masiya 1906 Kitamo 1897 Malumbo 1905

¹ Mundu atugheshijie uswi huwo, sa wahiri wa Kristo, na virote vya mbiso ja Izuwa.

² Ahawa kiendwa ghati ya virote, mundu awonwe mwitikiji.

³ Kake hangu ni kindu kidongo muno niyowe na unywi, kana kuyowa kwa mundu: ee, sikuyoa mwenye.

⁴ Amu sitisiwemi kiteto wanga yangu mwenye; kake hena iyo sitarwami kuoka na ngalo: kake ula eniyoa ni Mzuri.

⁵ Hena lwa iyo musichile kiteto magheri mesimefika, mtano eneikaeze Mzuri, niye eneviangaja vindu viwisiwe vya kija, na enewonyanya raa mburi ja ngoro; niho mundu ose enewona luisiso lwakwe kufuma hakwe Izuwa.

⁶ Vindu ivi, wandwetu, hena fwana nakuwikia mwenye na Apolo hena lwenyu; nesa ghati yetu mukuloshe musivetie vila vitamiwe; mwe wenyu asikubaebae hena lwa mwe wanga ya mughenji.

⁷ Amu niani ewika lelano ghati yako na ungi? na una kini nsikiuhie? kake kwakicha ukiuhie, nini ukuisisa, sa usikiuhie?

⁸ Ingeriaha mwaighuta, ingeriaha mwamaza, mwaitoria tusioho uswi: ee, nikundie muitorie, nesa na uswi pia tuitorie hamwe na unywi.

⁹ Amu, naghamba, Izuwa etuwonja uswi waondo kuidiwika kwa wose, sa wandu wechiliwa kufwa: amu twaoshwa kindu kya kuyowa na masanga, na malaika, na wandu.

¹⁰ Uswi tutomode hena lwa Kristo, kake unywi muche ghati ya Kristo: uswi wanana, kake unywi muna zinya; unywi mwarumishwa, kake uswi tuna nguruna.

¹¹ Mtano yoo ichi twasikia nzaa, na twatonga tuhu, na twabighwa, na twasowa handu ha kutua dawu;

¹² na twahira, tukiareha ndima na mikono yetu wenye: tukirighwa, twatasia;

¹³ tukikinywa, tugumiria; tukichunganjwa, twasemba; twaoshwa sa makuku ma masanga, ikwe la vindu vyose, mtano ingeriaha.

¹⁴ Sitamami vindu ivi nesa nimgere nguruna, nde nimloshe sa waana wangu wekundike.

¹⁵ Amu mukioka na wakara elfu ikumi ghati ya Kristo, nde sa wawaweeo weingi: amu ghati ya Kristo Yesu nimbonie hena anjili.

¹⁶ Hena lwa iyo namsemba, muoke watamaiya wangu. Hena kindu iki nimwingije Timoteo henyu,

¹⁷ eye mwana wangu ghati ya Mzuri mkundwa na mwitikiji, naye enemkumbusha nzia zangu jioho ghati ya Kristo, sandu nalosha hose ghati ya makanisa mose.

¹⁸ Na mondo wekubaabaa sandu niokie sizami henyu.

¹⁹ Kake ninemzia afuhi, Mzuri ekikunda; na ninetisiwa, si kiteto kyawo wekubaabaa, nde zinya.

²⁰ Amu ufumwa wa Izuwa si ghati ya kiteto, nde ghati ya zinya.

²¹ Mukundieze? nimuzie na msenge, kana hena lukundo na ngoro ya uhoo?