1 Hena Wakorintho 3 - Sumu Yedi ya Isa Masiya 1906 Kitamo 1897 Malumbo 1905

¹ Na mi, wandwetu, siidime kumtetia sa wandu wa ngoma, nde sa wandu wa muri, sa ngerengere ghati ya Kristo.

² Nimrishie na mavee, si hena kijo kidindie; amu tomumeidime: hae, nete ingeriaha tomuidima.

³ Amu mtano ingeriaha unywi wandu wa muri: amu kukioka ghati yenyu kuneng’a na kulinganya, unywi si wa muri, na wenye kusela hena mikayie ya wandu?

⁴ Amu mwe ekighamba, Mi wa Paulo; na ungi, mi wa Apolo; unywi si wandu?

⁵ Nikini Apolo? na nikini Paulo? wahiri, na hena awa muitikije; na mundu ose sandu Mzuri emwingie.

⁶ Mi nihandie, Apolo enyoshie; kake Izuwa enetije.

⁷ Huwo nete ula ehandie ni kindu, nete ula enyoshie, nde Izuwa mwenye kunetija.

⁸ Na ula ehanda na ula enyosha ni mwe: kake mundu ose eneingwa awahache yakwe mwenye hena ndima yakwe.

⁹ Amu uswi wahiri waghenji wakwe Izuwa: unywi mbuwa yakwe Izuwa, ijengo lakwe Izuwa.

¹⁰ Hena mvono wa Izuwa niingiwe, sa mwaaria‐wa‐kujenga echee niwikie luwoko; na ungi ejenga wanga yakwe.

¹¹ Amu luwoko lwingi mundu teidimaye kuluwika nde lula luwikiwe, nilo Yesu Kristo.

¹² Kake mundu ekijenga wanga ya luwoko thahabu, fetha, mabwe ma zora mbaha, mti, nyasi, makuku;

¹³ ndima ya mundu ose inewonyanywa raa: amu musi uneifunukura, amu inejughuka motoni; na moto mjenye uneghesha ndima ya mundu ose, ni ndima ani.

¹⁴ Ndima ya mundu akeye ikiikaa eijengie wanga ya luwoko, eneuhia wuesi.

¹⁵ Ndima ya mundu akeye ikishotwa, enewona lutesho: kake mwenye enekijwa: nde sa hena moto.

¹⁶ Tomutisiwa ti unywi mwaoka hekalu la Izuwa, na Ngoma ya Izuwa yatua ndeni henyu?

¹⁷ Mundu akeye ekilinyamara hekalu la Izuwa, Izuwa enemnyamara ula; amu hekalu la Izuwa lishenete, na unywi ni huwo.

¹⁸ Mundu asikukenge. Mundu akeye ekigheshijia ti ni echee ghati yenyu masangeni aha, aoke etomode, nesa aoke echee.

¹⁹ Amu kucha kwa masanga ama ni utomode ha Izuwa. Amu itamiwe, Ula ewagura wechee ghati ya ng’eno yawo:

²⁰ Nawa, Mzuri ematisiwa makusaro mawo wechee, ti ni mahaya.

²¹ Huwo mundu asikuisise ghati ya wandu.

²² Amu vyose ni vyenyu; kwakicha Paulo, kana Apolo, kana Kefa, kana masanga, kana moo, kana kifwa, kana vindu vya ingeriaha, kana vindu vya akenya; vyose ni vyenyu;

²³ na unywi ni wakwe Kristo; na Kristo ni wakwe Izuwa.