1 Hena Wakorintho 2 - Sumu Yedi ya Isa Masiya 1906 Kitamo 1897 Malumbo 1905

¹ Na mi, wandwetu, nikanamuzie, siziemi na uwedi wa kuteta na wa kucha, nikimutindia mbiso ya Izuwa.

² Amu nisuie kutisiwa kindu ghati yenyu, nde Yesu Kristo, na ye ewanikwe.

³ Nikaoka msongorana wenyu ghati ya wunana na kuondoka na kudedema kwingi.

⁴ Na kuteta kwangu na kutinda kwangu tokuokie ghati ya viteto vya kuileja vya kucha, nde ghati ya luwonjo lwa Ngoma na lwa zinya:

⁵ nesa luitikijo lwenyu lusiimuke ghati ya kucha kwa wandu, nde ghati ya zinya ya Izuwa.

⁶ Kake twateta kucha ghati yawo weining’oi: kake si kucha kwa masanga ama, nete kwa waitoria wa masanga ama, wekundie kuteka:

⁷ Kake twateta kucha hena Izuwa hena mbiso, niko kucha kuwisiwe, Izuwa ekuwikie kuwoka kwa masanga hena kirumi kyetu:

⁸ Asikutisiwe mwe wa waitoria wa masanga ama: amu kwakicha wekikutisiwa, tewekimbanika Mzuri wa kirumi:

⁹ Kake sandu itamiwe, Vila ijiso lisiviwone, nete isikio lisivisikie, nete visiingie ngoroni ha mundu, vyose Izuwa ewaarehie wala wemkundie.

¹⁰ Kake Izuwa etujughuie uswi hena Ngoma: amu Ngoma eyoa vindu vyose, mtano vila viforeke vyakwe Izuwa.

¹¹ Amu niani ghati ya wandu evitisiwa vindu vya mundu, nde ngoma ya mundu ioho ndeni hakwe? Huwo tehena evitisiwa vindu vya Izuwa, nde Ngoma yakwe Izuwa.

¹² Kake tuuhie, si ngoma ya masanga, nde ngoma ya kufuma ha Izuwa; nesa tuvitisiwe vindu tuingiwe huwo na Izuwa.

¹³ Na vindu ivi pia twaviteta, si na viteto vila kucha kwa mundu kwavilosha, nde vila Ngoma yavilosha; tukirunganya vindu vya ngoma na vindu vya ngoma.

¹⁴ Mwenye lukishoni lwa mundu teuhiaye vindu vya Ngoma ya Izuwa: amu ivi ni utomode hakwe; nete teidimaye kuvitisiwa, amu vyayowa hena ngoma.

¹⁵ Kake ula wa ngoma eviyoa vyose, na mwenye teyowaye na mundu akeye.

¹⁶ Amu niani elutisiwa lusaro lwakwe Mzuri, awone kumlosha? Kake uswi tuna lusaro lwakwe Kristo.