1 Hena Wakorintho 16 - Sumu Yedi ya Isa Masiya 1906 Kitamo 1897 Malumbo 1905

¹ Na hena mburi ya kuwawunganyia washenete, sandu nimaaghanyie makanisa ma Galatia, huwo pia na unywi mukete.

² Musi wa kuwoka wa juma mundu ose wa henyu akuwikie kiwisiwe, sandu eketa nguwari, kuwunganya kusiarehiwe nikiza.

³ Na nikifika, wandu akeye munewasaghura hena mawaraka, awa ninewaingija watike awahache yenyu mtano Yerusalemi:

⁴ na kwakicha yaniwe mi kutonga pia, wenetonga hamwe nami.

⁵ Kake ninemuzia, nikiidiwa kuvetia ghati ya Umakedoni; amu navetia ghati ya Umakedoni:

⁶ kake henyu ngea nineikaa kadongo, kana magheri ma kisie, nesa munifunye ghati ya kyaro kyangu hose nitongaho.

⁷ Amu sikundiemi kumbona ingeriaha nzieni; amu naing’idaki kuikaa magheri henyu, Mzuri ekikunda.

⁸ Kake nineikaa Efeso mtano Pentekote;

⁹ amu mbenge mbaha na ina mwanya yanijughukia, na wekanana ni weingi.

¹⁰ Na Timoteo ekiza, yoeni aoke henyu esina fole: amu eihira ndima ya Mzuri, sandu na mi pia:

¹¹ hena lwa iyo mundu asimdae. Kake mumfunye ghati ya kyaro kyakwe na luworo, nesa anizie: amu namyoia kuza hamwe na wandu wa hetu.

¹² Kake hena mburi ya Apolo wa hetu, nimsembie muno amuzie hamwe na wandu wa hetu: na tekikundike deng’e aze ingeriaha: kake eneza ekiwona mwanya.

¹³ Cheweni, imukeni nezo ghati ya luitikijo, keteni kiume, dindeni.

¹⁴ Vyose muvikete viketike ghati ya lukundo.

¹⁵ Ingeriaha namsemba, wandwetu (mwaitisiwa nyumba ya Stefana ti ni malumbulo ma Akaya, na ti wekugera kuwahiria weshenete).

¹⁶ Unywi pia muitoriwe na wandu sa wala, na mundu ose eghenja ndimeni na ehira.

¹⁷ Na naizihirwa hena kuza kwakwe Stefana na Fortunato na Akaiko: amu kila kiduhuke kufuma henyu weetie.

¹⁸ Amu weisoghosha ngoma yangu na yenyu: hena lwa iyo watwarijeni wandu sa awa.

¹⁹ Makanisa ma Asia memkezia. Akula na Priska wamkezia muno ghati ya Mzuri, na kanisa lioho nyumbeni hawo.

²⁰ Wandu wa hetu wose wemkezia. Kezianeni na kunyonyoza kushenete.

²¹ Ngezia yangu mi Paulo na mkono wangu mwenye.

²² Mundu esimkundie Mzuri aoke anathema. Maran atha.

²³ Mvono wa Mzuri Yesu Kristo uoke hamwe na unywi.

²⁴ Lukundo lwangu luoke hamwe na unywi wose ghati ya Kristo Yesu. Amen.