1 Hena Wakorintho 12 - Sumu Yedi ya Isa Masiya 1906 Kitamo 1897 Malumbo 1905

¹ Na hena mburi ya viingijo vya ngoma, wandwetu, sikundiemi musowe kutisiwa.

² Mwatisiwa ti mukinaoke Mambare mutikwe hae hena sanamu jila jisitete, sandu mwarongojwa.

³ Hena lwa iyo namuinga mutwarije, ti tehenaho mundu ekiteta ghati ya Ngoma ya Izuwa eghamba Yesu ni anathema: nete tehenaho mundu eidima kughamba, Yesu ni Mzuri, nde ghati ya Ngoma Mshenete.

⁴ Hena kulelana kwa viingijo, kake Ngoma ni mwe.

⁵ Na hena kulelana kwa mahirio, na Mzuri mwe.

⁶ Na hena kulelana kwa mihiro, nde Izuwa mwe, evihira vyose ghati ya wose.

⁷ Kake mundu ose eingiwe luwonjo lwa Ngoma hena mbucha.

⁸ Amu mwe eingiwe hena Ngoma kiteto kya kucha: ungi kiteto kya lutwarijo, hena Ngoma ilaila:

⁹ ungi luitikijo, ghati ya Ngoma ilaila; ungi viingijo vya kuhoja, ghati ya Ngoma ili mwe;

¹⁰ ungi mihiro ya zinya; ungi kurota; ungi kutwarija ngoma; ungi mbare jingijingi ja malumi; na ungi kugharusha malumi:

¹¹ Kake ndima iji jose ejihira Ngoma mwe ilaila, ikimgawia mundu ose mwemwe sandu ikundie.

¹² Amu sa muri ni mwe, na una marungo meingi, na marungo mose ma muri, mekioka meingi, ni muri mwe; ni huwo na Kristo pia.

¹³ Amu ghati ya Ngoma mwe tubatizwe wose ghati ya muri mwe, kwakicha Wayahudi kana Wayonani, kwakicha wazoro kana esiwazoro; tukanyoshwa wose Ngoma mwe.

¹⁴ Amu muri si irungo imwe, nde meingi.

¹⁵ Kughu kukighamba, Amu simi mkono, simi wa muri; hena lwa iyo tokuoka si wa muri.

¹⁶ Na isikio likighamba, Amu simi ijiso, simi wa muri; hena lwa iyo telioka si la muri.

¹⁷ Kwakicha muri ose uokie ijiso, nihi kuneoka kusikia? kwakicha ose uokie kusikia, nihi kuneoka kunyusha?

¹⁸ Kake ingeriaha Izuwa emawika marungo imweimwe murini, sandu imwiseja.

¹⁹ Na kwakicha meokie mose irungo imwe, nihi uneoka muri?

²⁰ Kake ingeriaha nimo marungo meingi, nde muri mwe.

²¹ Na ijiso teliidima kuuwurra mkono, Sikuwaiya we; netewa mtwi kukuwurra kughu, Sikuwaiya we.

²² Hai, muno kukela, marungo mala ma muri mewonwa kuoka manana, nimo mewaika:

²³ Na mala marungo ma muri, twamagheshijia kuoka ma nganyi ndongo, wanga ya ama twaneta kuwika nganyi ikelie; na marungo metu mesina uwedi, meneta muno kuoka na uwedi;

²⁴ kake marungo metu ma uwedi temewaiyamo; kake Izuwa eulunganya muri hamwe, ekiwika nganyi ikelie hena irungo lila laduhuka;

²⁵ nesa lisioke tanyo ghati ya muri; nde marungo marindane hena kuringanana.

²⁶ Na kwakicha irungo limwe lawawiwa, marungo mose mewawiwa hamwe nalo; kana irungo imwe likirumishwa, marungo mose meizihirwa hamwe nalo.

²⁷ Na unywi ni muri wakwe Kristo, na mwemwe marungo makwe.

²⁸ Na Izuwa ewika wandu kaniseni, wa kuwoka, waondo, wa keri waroti, wa katatu walosha, nawa zinya, nawa viingijo vya kuhoja, majengo, mabohio, mbare jingijingi ja malumi.

²⁹ Wose waondo? wose waroti? wose walosha?

³⁰ wose wahiri ndima? wose wena viingijo vya kuhoja? wose weteta na malumi?

³¹ wose wegharusha viteto? Kake kundeni muno viingijo evyo vibaha. Na nambonja nzia eyo yedi hena kukela.