1 Hena Wakorintho 11 - Sumu Yedi ya Isa Masiya 1906 Kitamo 1897 Malumbo 1905

¹ Muoke watamaiya wangu, sandu mi pia ni wa Kristo.

² Namwisisa amu mwanikumbuka ghati ya vyose, na mwamagura nezo mauhio, sandu namawika henyu.

³ Kake nikundie mutisiwe, ti mtwi wa mume ose ni Kristo; na mtwi wa mche ni mume; na mtwi wa Kristo ni Izuwa.

⁴ Mume ose ekiomba kana ekirota, ekioka na mtwi ufinikirwe, eugera nguruna mtwi wakwe.

⁵ Kake mche ose ekiomba kana ekirota ekioka na mtwi usifinikirwe, eugera nguruna mtwi wakwe: amu ni kimwe na kuringanana na sa eenjijwe.

⁶ Amu mche asafinikirwe, na achwiwe nyui pia: kake kwakicha ni nguruna hena mche kuchwiwa nyui kana kuenjwa, afinikirwe.

⁷ Amu kididi teimbe mume kuoka na mtwi ufinikirwe, amu niye fwana na kirumi kya Izuwa: kake mche ni kirumi kya mume.

⁸ Amu mume si wa kufuma mche, nde mche wa kufuma mume:

⁹ amu nete mume telungiweye hena mche; nde mche hena mume:

¹⁰ hena lwa iyo yambe mche kuoka na luwano lwa luidimo mtwini, amu ya malaika.

¹¹ Kake nete mche esina mume, nete mume esina mche, ghati ya Mzuri.

¹² Amu sandu mche ni wa kufuma mume, na huwo mume ni hena nzia ya mche; kake vyose ni vya kufuma ha Izuwa.

¹³ Chilieni ghati yenyu wenye: ni kyedi mche amwombe Izuwa asifinikirwe?

¹⁴ Lukishoni lwenyu tolumlosha, ti, mume ekioka na nyui ndeza, ni nguruna hakwe?

¹⁵ kake mche ekioka na nyui ndeza, ni kirumi hakwe, amu eingiwe nyui yakwe hena finikiro.

¹⁶ Kake mundu ekiwonwa kuoka na kitaghara, totuna mikayie sa ii, nete makanisa ma Izuwa.

¹⁷ Kake ghati ya kumwinga itanawo ili, simwisisami, ti mwawunganyika si hena vyedi nde hena viwiwi.

¹⁸ Amu kuwoka, mukiwunganyika kaniseni, nasikia ti matanyo meoho ghati yenyu; na mondo nakiitikija.

¹⁹ Amu tena huwo kuoka maeresi ghati yenyu, nesa wala wekundika wawonyanywe raa ghati yenyu.

²⁰ Hena lwa iyo mukiwunganyika hamwe, tekiidimika kula kijo kya Mzuri:

²¹ Amu ghati ya kula kwenyu mwe euha kuwoka kwa mughenji kijo kyakwe mwenye; na mwe esikia nzaa, na ungi eengea.

²² Nikini? tomuna nyumba ja kulia na kunywia, kana mwalidaa kanisa la Izuwa, na kuwagera soni wala wesina? Nikini nimburre? Nimwisise ghati ya iki?

²³ Simwisisami. Amu niuhie ha Mzuri kila niking’olie henyu, ti Mzuri Yesu kio kila ekinang’olwe euhie ibumunda;

²⁴ na ekinaanjele, akalibaa, akaghamba, Ili nilo muri wangu, egho hena unywi: keteni iki hena lukumbusho lwangu.

²⁵ Na huwo ndemwa, kutera kwa kijo, ekighamba, Ndemwa ii ni aghanyo isha ghati ya sakame yangu: keteni iki, magheri mose mukinywa, hena lukumbusho lwangu.

²⁶ Amu magheri mose mukila ibumunda ili, na mukinywa ndemwa, mwakitoranya kifwa kyakwe Mzuri mtano eneikaeze.

²⁷ Hena lwa iyo ose enela ibumunda kana enenywa ndemwa ya Mzuri sandu isiinare, eneoka mtekwa hena muri na sakame ya Mzuri.

²⁸ Kake mundu akugheshe, na huwo ale la ibumunda, na anywe ya ndemwa.

²⁹ Amu ula ela na enywa, ela na enywa wuchili wakwe mwenye, ekioka tetwarijaye muri.

³⁰ Hena kindu iki weingi ghati yenyu wewajua na weketa mbolembole, na si wafaa weshinjia.

³¹ Kake tukioka tukutwarija wenye, totunechiliwa.

³² Kake tukichiliwa, twabighwa na Mzuri, tusichiliwe hamwe na masanga.

³³ Hena lwa iyo, wandwetu, mukiwunganyika hena kula, indaneni.

³⁴ Mundu akeye ekisikia nzaa, ale kijo kaa; kuwunganyika kwenyu kusioke hena wuchili, Na vila vishighajike nineviareha nikiza.