1 Hena Timoteo 6 - Sumu Yedi ya Isa Masiya 1906 Kitamo 1897 Malumbo 1905

¹ Wose weoho si ya ighogholo wawagheshijie wazuri wawo wenye ti yawawe kuuhia nganyi yose, nesa izina la Izuwa na ichundo masitetwe viwiwi.

² Wala wena wazuri waitikija, wasiwadae, amu ni wandu‐wa‐hawo: kake keba wawatumikie, amu wala weuhia uwedi ni waitikiji na wakundwa. Ivi uviloshe na uvitinde.

³ Mundu ekilosha ichundo lingi, na tekundieye viteto viduwie, viteto vya Mzuri wetu Yesu Kristo, na ichundo elo la wukundi‐izuwa;

⁴ ekubaabaa, asitisiwe kindu, nde eroghia ghati ya mawujanyo na malelano ma viteto, na kufuma ama kwaza kuneng’a, kubighana, kurigha, kugheshijia kusiwe.

⁵ Malelano ma wandu wenyamarika ghati ya lusaro na wekitekiwa kididi, wekighamba ti wukundi‐izuwa ni nzia ya mbucha.

⁶ Kake wukundi‐izuwa hamwe na kuhoia ni mbucha mbaha:

⁷ amu totuetie kindu masangeni, nete totuidima kutika kindu kufuma masangeni;

⁸ kake tukioka na kijo na cha kukufinikira tunehoia na ivi.

⁹ Kake wala wekundie kuoka wamazi wagwa ghati ya ghesho na izero na malangwa meingi ma kutomoda na kuwinya, nimo merushijia wandu ghati ya lunyamaro na lutesho.

¹⁰ Amu mgi wa viwiwi vyose ni kukunda fetha; na wandu weoho weakia wakazarika kufuma luitikijo, wakakusoma na maluwawo meingi.

¹¹ Kake we, mundu wa Izuwa, matuka ivi; uratere ngalo, wukundi‐izuwa, luitikijo, lukundo, lugumirio, wuhoo.

¹² Bighana bighano ledi la luitikijo, gura moo wa ndarasi, hena uo uitangwe, ukaghamba lughambo lwedi mesoni ha mashahidi weingi.

¹³ Nakuitanawa mesoni ha Izuwa, eye eng’ola moo hena vindu vyose, na ha Yesu Kristo, eye msongorana wakwe Pontio Pilato eshuhudie lughambo lwedi:

¹⁴ Uligure aghanyo, usina mawaa, usina linganyo, mtano kufumiria kwa Mzuri wetu Yesu Kristo:

¹⁵ na kufumiria uku enekuwonja magheri makwe mwenye, eye etasiwa na Mzinya mjenye, Mfumwa wawo weitoria sa wafumwa na Mzuri wawo webohia sa wazuri;

¹⁶ eye mjenye ena kusafwa, ekitua ghati ya kyangaji kisisongerika; nete tehenaho mundu embonie nete eidima kumbona: hakwe nganyi na zinya ya ndarasi. Amen.

¹⁷ Uwaitanawe wamazi masangeni ha ingeriaha, wasikukweje, nete wasiwike luing’idaki lwawo wanga ya esidawu ya mali, nde wanga yakwe Izuwa, eye etuingie vindu vyose hena wumazi, tuisejwa navyo:

¹⁸ na ti wakete nezo, waoke wamazi ghati ya ndima jedi, waoke wandu wa kugawa na waghenji, wakundi kushanganya:

¹⁹ wekikuwisia luwoko lwedi hena magheri ma akenya, nesa wagure moo ula egho moo wa kididi.

²⁰ Ee Timoteo, kirinde kila kiwikwe hako, ukigharuka hae kufuma viteto vya kutomoda na malelano ma lutwarijo, luitangwa huwo hena maongo:

²¹ amu wandu weoho wekimagura, wetekwa ghati ya vindu vya luitikijo. Mvono uoke na unywi.