1 Hena Timoteo 5 - Sumu Yedi ya Isa Masiya 1906 Kitamo 1897 Malumbo 1905

¹ Usibohie mughosi, nde umtindie sa waweo; wabwange sa wandwenyu; wacheku sa waiya;

² wache wadongo sa warumburio, ghati ya kuzerra kwose.

³ Uwagurie nganyi ngawiani, woo ngawiani kididi.

⁴ Kake kwakicha ngawiani akeye ena waana kana wakokoye, wakuloshe kuwoka kugura‐mbea hena nyumba yawo wenye, na kuwaihia warewawona: amu iki kikundike mesoni ha Izuwa.

⁵ Na ula ngawiani kididi, na ekimumu, embikia Izuwa luing’idaki lwakwe, na eikaa ghati ya masembio na maombo kio na hemusi.

⁶ Kake ula ekung’ola hena maisejo efwie magheri eoho na moo.

⁷ Vindu ivi pia uviaghanye, nesa waoke wesina linganyo.

⁸ Kake mundu asiwarisha wa hakwe, na muno wala wa nyumbeni hakwe, ekukania luitikijo, na ni mbiwi kukela mundu esiitikija.

⁹ Ngawiani atamwe esiduhuka miaka makumi matandatu hena miaka yakwe, eokie mche wa mume mwe,

¹⁰ eng’oliwe mburi ghati ya ndima jedi; kwakicha ewarerie waana, kwakicha ewatighe wagheni, kwakicha ewaoje weshenete maghu, kwakicha ewaghenje wenye wasi, kwakicha eratere na lunyarki ndima yedi yose.

¹¹ Kake ngawiani wadongo uwasue: amu weking’enda wanga ya Kristo, wekunda kuaikwa;

¹² wekioka na wuchili, amu welushigha luitikijo lwawo wa kuwoka.

¹³ Nawo wekulosha pia wudoko, wekijunguluka kufuma nyumba mtano nyumba; na si wadoko tiki, nde wamaayi pia na wekulilikia, wekiteta vindu visiwawe.

¹⁴ Hena lwa iyo nikundie ngawiani wadongo waaikwe, wawone waana, waitorie wandu wa nyumba yawo, wasimwinge mring’a mwanya wa kuteta viwiwi;

¹⁵ amu weoho weidiwa kugharuka mbai kumratera Shetani.

¹⁶ Mche mwitikiji ekioka na wangawiani, awaghenje, na kanisa lisigerwe mwagho; nesa liwaghenje wala ngawiani kididi.

¹⁷ Waghosi weitoria nezo wagheshijiwe ti yawawe nganyi kandu keri, na muno wala wehira ghati ya kiteto na ghati ya kulosha.

¹⁸ Amu kitamo kyateta, Usimchunge miomo ng’ombe magheri ebughutua. Nawa, Wumbe mhiri wuesi wakwe.

¹⁹ Usiuhie linganyo wanga ya mughosi, nde hena mashahidi weri kana watatu.

²⁰ Wala weketa ng’oki uwadewere msongorana wa wose, nesa wala weshighajike waoke na fole pia.

²¹ Nakuitanawa msongorana wa Izuwa, na Kristo Yesu, na malaika wasaghurwa, uvigure vindu ivi usisaghure kuwoka, usikete kindu hena lukundio.

²² Usimgere mundu mikono na usara, nete usioke mshanga ng’oki ja wandu wengi: ukuikaje hena wuchobwe.

²³ Usiokewa mnywa‐mbombe, nde uhe mvinyo kadongo hena lwa ndeni yako na kuwajuwa kwako kandu keingi.

²⁴ Wandu weoho wenye ng’oki ja some, jikirongora hena wuchili; na wandu weoho, jawaratera nyuma.

²⁵ Na huwo pia hena ndima jedi ja some, najo esihuwo tejiidima kuwiswa.